За две недели ќе бидат готови протоколите со кои од септември ќе се овозможи целосно враќање на учениците во училиштата на настава со физичко присуство. Министерот за здравство Венко Филипче најави дека се договараат техничките детали околу протоколите во работната група меѓу МОН и комисијата за заразни болести. Со пратките од 600 илјади вакцини, кои треба да стигнат за неколку дена, Филипче најави вакцинација на сите наставници, бидејќи од 30 илјади досега се вакцинирале 10 илјади.
„Се однесува на тоа, децата да се присутни 100%, така се прават протоколите. Има мерки за дезинфекција, мерки за влез и излез, за немешање различни класови. Ми се чини дека за не повеќе од две недели протоколите ќе бидат целосно завршени“,
рече Филипче.
Министерот Филипче вели дека одлуката на Бирото за развој на образованието да не се делат сега свидетелства на учениците оти нема услови, не е донесена во координација со министерството.
„Свидетелствата можат да се делат во дворовите. Сè што може да се организира надворешни услови, може да се направи“,
додаде Филипче.
Во однос на стекнувањето колективен имунитет, Филипче појасни дека 60-70% треба да е опфатот на вакцинација на населението, а пресметката се прави врз основа на вкупниот број вакцинирани, независно дали прележале ковид или не.
„Можно е некаква форма, како сега на индискиот сој на вирусот, да ја смени епидемиолошката слика, но битно е дека и вакцинираните кои евентуално би заболеле од таа форма нема да имаат тежок облик на болеста“,
изјави Филипче.