Меѓународната организација за миграција објави дека од 2014 година досега повеќе од 20.000 мигранти загинаа во Средоземно Море
Претседателот на Турција, Реџеп Тајип Ердоган вчера издаде наредба крајбрежната стража да не им дозволува на бегалците, поради нивна безбедност, да го преминуваат Егејско Море.
Спроведувањето на мерката ќе го надгледува турското Министерство за внатрешни работи.
Турската крајбрежна стража ја обвинува Грција дека ги крши меѓународните закони со тоа што ги доведува во опасност чамците со бегалци и мигранти и тврди дека во четвртокот спасила 100 мигранти од три бродови кои тонеле, а грчката крајбрежна стража не реагирала.
Меѓународната организација за миграција (ИОМ) вчера објави дека од 2014 година досега повеќе од 20.000 мигранти загинаа во Средоземно Море.
Од почетокот на јануари 14.000 мигранти ја преминале западната, средната и источната рута, кои водат до европскиот брег. Најмалку 211 луѓе настрадаа или се водат како исчезнати.
Според ИОМ, минатата година околу 100.000 луѓе успеале да стигнат до брегот на Европа, додека на море страдале 1.885 мигранти.
Иако е намален бројот на смртни случаи во споредба со 2016 година, кога загинаа над 5.000 луѓе, зголемен е бројот на загинати при обидот за преминување на средната рута кон Италија и на западната рута кон Шпанија.