Ние ѝ дадовме на Шведска список од 120 лица и им кажавме да ги екстрадираат тие терористи, потсети Ердоган
Турскиот претседател Реџеп Таип Ердоган најави дека Анкара може да се согласи Финска да влезе во НАТО, но не и Шведска.
Тој синоќа повторно го критикуваше одбивањето на шведските власти да екстрадираат десетици луѓе наводно, како што тврди, поради поврзаност со курдските милитантни групи и други критичари на неговата влада.
„Ако сакате да се приклучите на НАТО, ќе ни ги вратите овие терористи“,
вели Ердоган.
Во својот говор синоќа тој рече дека Турција можеби ќе даде поинаков одговор за Финска, додека Шведска ќе биде шокирана.
„Ние ѝ дадовме на Шведска список од 120 лица и им кажавме да ги екстрадираат тие терористи“,
рече турскиот претседател.
Овие негови коментари во кои најавува поинакво третирање на апликациите на двете држави, доаѓаат неколку дена откако Турција ги прекина разговорите за нивно прифаќање како членки на Алијансата. Тоа беше поттикнато од серија протести во Стокхлом, вклучувајќи го и оној на кој во близина на турската амбасада беше запалена копија од Куранот.
Шведските власти тогаш ги осудија протестите, но застанаа на страна на законите за слобода на говорот.
По децении воена неутралност, Шведска и Финска побараа влез во НАТО по руската инвазија на Украина. Нивните апликации мора да добијат зелено светло од сите сегашни членки на Алијансата, меѓутоа пристапните протоколи досега не ги ратификуваа Турција и Унгарија.