Тупанчевски за прекинатата седница за одложување на пензионирањето на судии и обвинители: Работите одат во насока дека таа е завршена

Тоа ќе значи дека ќе има сериозни импликации затоа што одењето во пензија на судиите и јавните обвинители ќе значи дека голем дел од постапките ќе треба да почнат одново, објасни министерот за правда

Прекинување на собраниска седница не значи дека таа е завршена, но во таа насока се движат состојбите, изјави денеска министерот за правда Никола Тупанчевски откако вчера пленарната седница на чиј дневен ред беше предлог-дополнувањето за Законот за работни односи со кои се продолжува рокот за пензионирање на 70-тина судии и обвинители беше прекината поради блокада од опозицијата и не е извесно дека ќе продолжи.

Прекината собраниската седница на која требаше да се гласаат измени на законот за работни односи со што ќе се продолжеше мандатот на 70-тина судии и обвинители

„Последното што го слушнав е дека седницата е прекината. Прекината седница не значи завршена седница. Јас повторно велам, не знам како ќе се одвива денешниот ден. Меѓутоа, дефинитивно во таа насока се движат состојбите. Тоа ќе значи дека ќе има сериозни импликации затоа што одењето во пензија на судиите и јавните обвинители ќе значи дека голем дел од постапките ќе треба да почнат одново. Да не заборавиме, не се работи за една или за две постапки кога се менува судијата во постапката тогаш процесот започнува одново. Реков, не знам колкав е во моментов бројот меѓутоа не е мал. Тоа е првата работа. Да не заборавиме, тука се разбира како дамоклов меч ни виси институтот на застареност, дел од постапките коишто се во тек или кои што се движат може да имаат одредена застареност во однос на нивниот правен епилог“,

рече тој.

Тој притоа посочи на три предлози: Едниот предлог за решавање на актуелниот проблем бил да се даде можност на лица коишто имаат одредено искуство во сферата на правосудството како што се адвокати, стручни соработници со пократка обука да бидат дел или да бидат решение од овој проблем.

„Втората опција беше да се зголеми бројот на слушатели на Академијата за судии и јавни обвинители, исто така некој вид на бајпасирање на актуелната состојба и третата опција беше оваа со измени на Законот за работни односи меѓу другото да се продолжи, меѓутоа потенцирам да се продолжи три години работниот век на судиите и јавните обвинители. Ова го велам затоа што првпат во историјата на државата се случува во еден ваков момент олкав голем број на судии и јавни обвинители да одат во пензија“,

рече Тупанчески.