Пензионираните пилоти утре претпладне би потпишале договори на дело, а потоа ќе може да излезат на терен и да интервенираат на некој од активните пожари во државата
Двајцата пензионирани пилоти на „ертракторите“ од утре повторно ќе бидат ангажирани и ќе може да интервенираат во гасење на пожарите, инофмираат денеска од Центарот за управување со кризи (ЦУК).
Одлуката, како што велат оттаму, е донесена на денешната седница на Владата согласно предлогот на Дирекциајта за заштита и спасување (ДЗР). Пензионираните пилоти утре претпладне би потпишале договори на дело, а потоа ќе може да излезат на терен и да интервенираат на некој од активните пожари во државата.
„Веднаш по потпишување на договорите на дело Агенцијата за цивилно воздухопловство ќе ја тргне забраната за летање и ‘ертракторите’ на ДЗС ќе може да полетаат кон пожарот на планината Серта (Конечка планина), а по потреба и кон кој било друг приоритетен пожар за гаснење“,
информираат од ЦУК.
Директорот на ЦУК, Стојанче Ангелов, пред неполн месец изјави дека освен хеликоптерите на МВР и АРМ на располагање во гаснењето на пожарите се и три „ертрактори“ во сопственост на Дирекцијата за заштита и спасување, но оти тие се нефункционални поради пензионирањето на двајца пилоти. За проблемот, како што рече, уште пред три до четири месеци била известена тогашната техничка влада во заминување.