Според информациите од ЦУК, ставен под контрола е пожарот кај градската депонија во Општина Крушево
Од вкупно 36 пожари во текот на вчерашниот ден, активни се шест. Еден пожар е ставен под контрола, а изгаснати се 27, информираат од Центарот за управување со кризи (ЦУК).
Пожарот на територија на Прилеп е активен со краци кон селата Пештани, Кокре, Кален, Дуње, Бонче, Крушевица, Волково, Штавица, Прилепец, Чимово и Селце кон местото викано Чуле на Селечка планина.
Активен и е пожарот во Општина Чашка на планината Мукос, кај селото Ораов дол. Во Општина Петровец, кај селата Градманци, Брезница и Катланово гори нискостеблеста шума.
Во Штипскиот Регион гори кај селата Хаџи Камзали, Едерлеци и Тплик, како во подрачјето на полигонот „Криволак“, каде што гори нискостеблеста шума.
Мешана шума гори во Чучер Сандево, кај селото Танушевци, на местото викано Рамно. Во Долцени гори кај селото Десово.
Според информациите од ЦУК, ставен под контрола е пожарот кај градската депонија во Општина Крушево.
Изгаснати се пожарите во Општините Кратово, Ѓорче Петров, Виница, Делчево, Кочани, Куманово, Липково, Битола, Росоман, Брвеница, Тетово, Гостивар, Врапчиште, Гевгелија, Струга, Кичево, Боговиње, Крушево, Сарај.