Од Центарот за управување со кризи додаваат дека на располагање се и три ертрактори на ДЗС и два хеликоптери на МВР, доколку дојде до разгорување на пожарот
Пожарот кај Богданци сѐ уште не е ставен под целосна контрола, но во овој момент нема активно горење, соопштија утринава од Центарот за управување со кризи (ЦУК) откако беше најавено дека тимови на повеќе институции и противпожарни бригади денеска околу 6 часот ќе продолжат со гаснењето на пожарот.
„Во овој момент нема активно горење на пожарот кај Богданци, чад има на повеќе места и пожарот сѐ уште не е ставен под контрола“,
соопштија утринава од ЦУК.
Пожарникари од Гевгелија, Валандово, Кавадарци и од Штип, заедно со тим од Дирекцијата за заштита и спасување (ДЗС), Национални шуми и Јавното комунално претпријатие од Богданци, додаваат од ЦУК, утринава се обидуваат да го заобиколат пожарот од сите страни за да го изгаснат.
„Доколку во подоцнежните часови дојде до разгорување на пожарот, на располагање стојат три ертрактори на ДЗС, како и два хеликоптери на МВР“,
додаваат од ЦУК.
Пожарот во месноста Брдаров камен кај Богданци избувна вчера околу 11 часот. Првиот човек на ЦУК, Стојанче Ангелов, вчера оцени дека состојбата не е алармантна и дека ниту едно населено место не е загрозено.
Доцна синоќа од МВР соопштија дека пожарот е локализиран, односно спречено е негово ширење кон пределот каде што се наоѓаат ветерниците. Хеликоптерот на Министерството кој учествувал во акцијата исфрлил 17 тони вода.