Сè уште се активни пожарите на отворено во Општина Македонски Брод, кај селата Тажево и Брезница и кај ловиштетот ‘Јасен‘. Вториот е на териториите на Општините Демир Хисар и Охрид, поточно на Илинска Планина, кај селата Витово, Базерник, Мало Илино и Брежани
Шест пожари се активни на територијата на државата, од кои сè уште гори на критичните точки кај селата Тажево и Брезница во околината на Македонски Брод и во близина на ловиштето „Јасен“, како и на Илинска Планина. Според информациите што утрово ги сподели Центарот за управување со кризи (ЦУК), пожарот што вчера избувна кај гевгелиско Негорци е ставен под контрола.
Од 41 пожар што вчера се евидентирани, 26 се изгаснати, а девет се ставени под контрола.
„Активни се пожарите на отворено во Општина Македонски Брод, кај селата Тажево и Брезница и кај ловиштетот ‘Јасен‘. Вториот е на териториите на Општините Демир Хисар и Охрид, поточно на Илинска Планина, кај селата Витово, Базерник, Мало Илино и Брежани. Третиот е во Општина Чашка, кај селата Папрадиште и Ореше. Активен е и пожарот што изби вчера во Општина Петровец, кај селото Градманци. Гори и во Општина Кочани, кај местото викано ‘Панаѓур‘. Шестиот активен пожар е во Студеничани, кај селата Драчевица и Црвена Вода“,
велат од ЦУК.
Под контрола се ставени пожарите во Студеничани, како и во Гевгелија, Охрид, Македонски Брод, Пласница, Делчево, Прилеп и еден на територијата на Општините Богданци и Дојран.
На вчерашната владина седница е констатирано и дека само во јули се регистрирани 620 пожари. Се дискутирало и за штетите, но и за причините за толкавиот број пожари.
„Констатацијата е дека најголем дел од пожарите се предизвикани од човечки фактор, најмногу ненамерно, поради палење стрништа, пасишта и меѓи, додека во делот на намерно предизвиканите пожари, преовладуваат криминални мотиви и има повеќе такви случаи кои се испитуваат“,
се вели во соопштението од седницата.