Според Бектеши, намалувањето на цените ќе биде од 7 до 12 отсто, но тоа не е возможно да се случи моментално. Тој посочи дека и до 1 декември супермаркетите не биле празни и имале производи кои биле набавени по повисоки цени
Намалување на цените на основните прехранбени производи ќе има откако производителите ќе ги потрошат резервите што ги имаат во магацините, најави денеска министерот за економија Крешник Бектеши.
„Веќе е почнат трендот на намалување на цените на основните прехранбени производи наведени во одлуката на Владата, а ќе се случи и кај другите производители откако ќе ги потрошат резервите на претходно набавените производи по повисоки цени“,
истакна Бектеши пред почетокот на Словенечко-македонскиот форум за економска соработка.
Според Бектеши, намалувањето на цените ќе биде од 7 до 12 отсто, но тоа не е возможно да се случи моментално. Тој посочи дека и до 1 декември супермаркетите не биле празни и имале производи кои биле набавени по повисоки цени.
Тој како одговор на прашање поставено од новинарот кој вчера му даде леб и фискална сметка на премиерот Димитар Ковачевски, истакна дека треба да се има во предвид дека 10 отсто од цената од 50 денари е 5 денари намалување, а 7 отсто е уште помалку од 5 денари.
„Затоа кога ќе кажете такви работи, треба на правичен начин да ги информирате граѓаните. Намалување на 10 отсто од 40 денари е 4 денари. Цените не се такви како што вие кажувате“,
му одговори Бектеши на новинарот.
Министерот додаде дека компаниите во нивните магацини имаат резерви на производи, и домашни производи кои користат дистрибутер и производи кои се увезуваат во нашата држава.
„Тие резерви се набавени со различни цени. Новите резерви се набавуваат со други цени кои се пониски од претходните, што значи дека претходните резерви треба да се потрошат. Најверојатно ќе се потрошат оваа недела или на почеток на наредната недела, по што ќе се забележи дека ќе има намалување на цените на тие производи во синџирите на супермаркетите“,
појасни Бектеши.
Исто така, Бектеши рече дека субвенцијата што ја дава Владата во делот на електричната енергија е почната да се реализира од 1 декември во делот на компаниите, вклучувајќи ги основните, средните училишта, јавните комунални претпријатија и веќе компаниите започнаа да формираат нови цени кои ќе ги нудат на пазарот.
Министерот за економија Крешник Бектеши на 10 ноември најави дека цените на основните прехранбени производи во наредните 10 дена ќе се намалат.
„Во делот на лебот веќе почна поевтинувањето. Очекуваме во наредните 3-4 дена намалување на цените на млекото и млечните производи, а до крајот на наредната недела и намалување на цените на месните производи“,
рече тогаш Бектеши.