Во врска со проблемите со интернет-пристапот во руралните средини, министерката вели дека во сите помали и подрачни училишта е обезбедена настава со физичко присуство, а за децата без ИТ-уреди има предавања на МРТ
Бојкот или нарушување на протоколите во училиштата е неконструктивен начин на надминување на оваа криза во нашата држава. Секој од нас е одговорен за јавното здравје и правото на здравје. Ако некој директно и свесно го загрозува здравјето на другиот, тогаш имаме прекршување на закон и на Устав. Затоа ги повикувам сите наши граѓани, сите родители, наставници и ученици, дека секој од нас треба да се справува на конструктивен начин со оваа епидемија, изјави министерката за образование и наука Мила Царовска.
Таа вели дека треба да се почитуваат одлуките на Комисијата за заразни болести, зашто се темелат на факти, а владината комисија, која дава одобренија за настава со физичко присуство не решава, како што рече, затоа што сака или не сака да се отвори некое училиште, туку врз основа на аргументација и бидејќи смета дека постои ризик за нарушување на здравјето на целото население.
„Сега приоритет е зачувување на здравјето на сите наши граѓани, а негрижа за здравјето значи повеќе заразени и повеќе смртни случаи. Ако состојбата се менува на позитивно, нема да има некој што ќе застане против отворање на училиштата со физичко присуство, но ако е ваква или полоша, ќе размислуваме за други прашања за да го заштитиме јавното здравје, но и да обезбедиме континуитет на наставата на начини кои се можни во тој момент“ ,
изјави денеска Царовска.
Во врска со проблемите со интернет-пристап во рурални средини, одговори дека во сите помали и подрачни училишта е обезбедена настава со физичко присуство, а потсети и дека за децата без соодветни ИТ-уреди има предавања на МРТ на македонски и на албански јазик и учениците ќе добиваат материјали од училиштето.
„Ова се флексибилните модели и ваква ситуација има во сите земји во развој како нашата. Да не заборавиме и дека голем број од општините во изминатиот период донираа таблети за учениците што немаат“,
додаде Царовска.