Според краткиот опис на делото, две од обвинетите, како продавачки во билетарниците на ЈСП кај Зелен пазар и во Градскиот трговски центар (ГТЦ), уплаќале помалку од наплатените пари во готово, а третата преку книговодствени манипулации ја покривала неуплатената готовина од дневниот пазар
Скопското Основно јавно обвинителство поднело обвинителен акт против три вработени во Јавното сообраќајно претпријатие „Скопје“ кои се товарат дека во период од речиси три години незаконски присвоиле околу 376 000 евра од продажба на билети.
Трите обвинети соизвршителки се товарат за продолжено кривично дело проневера во службата, според член 354 од Кривичниот законик (КЗ).
Делото, според Обвинителството, го сториле во периодот од 1 декември 2018 до 5 август 2021 година, кога со умисла извршиле повеќе временски поврзани дејствија, притоа искористувајќи ист траен однос и исти можности.
„Тие заеднички, како одговорни лица вработени во Јавното сообраќајно претпријатие ‘Скопје’, со намера да прибават за себе противправна имотна корист, присвоиле пари доверени во службата во вкупен износ од 23 133 245 денари, што претставува значителна имотна корист“,
се вели во соопштението од Јавното обвинителство на Република Северна Македонија.
Според краткиот опис на делото, две од обвинетите, како продавачки во билетарниците на ЈСП кај Зелен пазар и во Градскиот трговски центар (ГТЦ), уплаќале помалку од наплатените пари во готово, а третата преку книговодствени малверзации и манипулации ја покривала неуплатената готовина од дневниот пазар.
„Третата обвинета, самостоен референт сметководител во Одделението за сметководство, Сектор за финансиско работење во ЈСП, иако знаела дека паричните средства не се уплатени и раздолжени, сметководствено вршела докнижувања, прекнижувања, исправки и други книговодствени дејствија без документација, за да може сметководствено да ги оправда и покрие неуплатените готови пари од дневниот пазар“,
велат од Обвинителството.
Со обвинителниот акт надлежниот јавен обвинител до судот доставил и предлог на трите обвинети да им бидат изречени мерки на претпазливост, односно забрана за напуштање на живеалиштето, обврска повремено да се јавуваат на определено службено лице или кај надлежен државен орган, како и одземање на пасошите.