Од Основното јавно обвинителство Скопје вечерва соопштија дека дежурен јавен обвинител и увидни екипи на МВР вршат увид на местото, на кое е повикан и сообраќаен вештак за утврдување на причините
Три лица загинаа, а пет се повредени во сообраќајна несреќа што денеска попладне со случила на автопатот Скопје – Велес, информираат од Министерството за внатрешни работи.
До несреќата, која била пријавена во 17:45 часот, дошло кога на автопатот пред тунелот се превртело комбе.
„Досега е констатирана смрт кај три лица, а пет се пренесени во болница за укажување помош. На лице место се упатени полициски екипи и јавен обвинител“,
велат од МВР.
Од Основното јавно обвинителство Скопје вечерва соопштија дека дежурен јавен обвинител и увидни екипи на МВР вршат увид на местото на тешката сообраќајна несреќа.
„На местото на несреќата е повикан и сообраќаен вештак за утврдување на причините. Се преземаат увидни дејствија, а јавниот обвинител ќе ги издаде сите потребни наредби за вештачења“,
велат од Обвинителството.
Претходно од Авто-мото сојузот на Македонија (АМСМ) соопштија дека поради сообраќајката блокирани се двете сообраќајни ленти на автопатот Скопје – Велес, а сообраќајот од 17:45 часот се пренесочува преку Петровец- Велес (по стариот пат) и Миладиновци – Свети Николе – Велес – Штип.