Трето патување на Мицкоски во Вашингтон, овојпат на конференција за конзервативна политичка акција

Првото патување во Соединетите Американски Држави како премиер беше на НАТО-самитот во јули минатата година, а второто во јануари годинава за време на инаугурацијата на претседателот Доналд Трамп

Премиерот Христијан Мицкоски од утре до 22 овој месец е во Вашингтон каде ќе присуствува на годишната Конференција за конзервативна политичка акција. Според владин извор, Мицкоски ќе има и обраќање на настанот.

Потврда за патувањето на Мицкоски денеска дојде од владината портпаролка Марија Митева, со краток одговор, без многу детали.

На новинарско прашање дали патувањето на Мицкоски е на државен трошок или, пак, со пари на неговата партија ВМРО-ДПМНЕ, Митева не даде директен одговор. Она што го кажа е дека Мицкоски е поканет како претседател на Владата.

„Со оглед на тоа што констатирате дека е присутен на конференција за политичка акција на конзервативни политички партии, премиерот е поканет како претседател на Владата“,

рече Митева.

Според неа, Мицкоски за време на посетата на Вашингтон се очекува да има и билатерални средби. За дополнителни информации Митева рече дека очекува јавноста да биде информирана во текот на наредните денови.

На веб-страницата за конференцијата може да се види дека има листа на говорници меѓу кои се американскиот дипломат Ричард Гренел, кој е претставник за специјални мисии на претседателот Доналд Трамп, лекарот, пронаоѓач и научник Роберт Малоун кој за време на короната беше обвинет за ширење дезинформации за вакцините, поранешниот висок советник на американскиот претседател Доналд Трамп, Стив Бенон.

Како дел од бројните говорници се најавуваат и Роберт Фицо, кој е актуелен премиер на Словачка, Лиз Трас која е поранешна премиерка на Велика Британија, Матеуш Моравјецки, поранешен премиер на Полска, како и Џордан Бардела кој ја предводи екстремната десница во Франција, заедно со Ле Пен.

Освен овие говорници предвидено е обраќање да има и телевизиската водителка Мегин Кели.

Цените на билетите за присуство на конференцијата, како што може да се види на веб-страницата се различни. Билет за млади чини 95 долари, генерален билет е по цена од 195 долари, а оние влезници со посебен пристап како „платинест билет“ чинат и до десетици илјади долари.

Инаку, ова е трето патување на Христијан Мицкоски за Вашингтон откако стана премиер. Првото патување во Соединетите Американски Држави беше на НАТО-самитот во јули минатата година.

За тоа што и постариот син на премиерот беше заедно со него во Вашингтон за време на НАТО-самитот, Државната комисија за спречување на корупцијата констатираше дека тој не бил дел од владината делегација и дека патувањето го платил сам.

ДКСК го затвори предметот за патувањето на синот на Мицкоски во САД – не бил дел од владината делегација, сам си ги платил патот и сместувањето

Втората посета на Мицкоски на Вашингтон беше за инаугурацијата на претседателот Доналд Трамп во јануари годинава.

Мицкоски во Вашингтон се сретна со Ричард Гренел, претседателски пратеник за специјални мисии и политика, со Девин Нунес, претседавач со советодавното тело за разузнавање на претседателот Доналд Трамп и извршен директор на Трамп медиумската корпорација, Џон Битов – американски бизнисмен со македонско потекло, сопственик на повеќе мултимилионски компани, Марко Галина – бизнисмен и одговорен за МАГА во Португалија и Крис Павловски, сопственик на групацијата „Рамбл“.

Мицкоски се сретнал со Гренел: Побарав поголемо ангажирање од нашите партнери во остварување на стратешките интереси за членството во ЕУ

Премиерот информираше дека на средбите за лобирал за македонските интереси.

Мицкоски за време на инаугурацијата на Трамп беше придружуван од министерот за надворешна политика и надворешна трговија Тимчо Муцунски, вицепремиерот и министер за животна средина и просторно планирање Изет Меџити и заменик-министерката за европски прашања Викторија Трајков.

Што правеа Меџити, Таравари и Трајков во САД – прашање до премиерот Мицкоски