„Тоа што забораваат да го направат е при спинувањето и при изнесувањето на лагите користат бескурпулозни и безобразни мерки. Забораваат дека не сите претседатели на грански синдикати се вработени во синдикатите и примаат плата од синдикална членарина. Дел од претседателите на гранските синдикати се вработени во приватни компании и примаат плата“, рече претседателот на ССМ
Смета дека Владата и покрај укажувањата од сите во државата одлучила да води војна, односно, како што рече, на тоа се одлучиле „поединци во политичката партија ВМРО-ДПМНЕ, во некој таму таен кабинет“
Не можеме да дозволиме ниту еден работник да трпи политички притисоци какви што се обидуваат да му нанесат на синдикалното раководство, рече Слободан Трендафилов, претседател на Сојузот на синдикати на Македонија (ССМ), во вечерашното интервју во „Топ тема“ на телевизија Телма.
„Токму затоа сме ние избрани од нив, токму затоа ние примаме плата од нив, за ние да ги трпиме сите притисоци. Јавна седница е сега. Не исклучуваме можност утре да е протест, а другиот ден да биде генерален штрајк. Тоа што денеска им го покажавме е дека не се плашиме, без оглед на тоа колку нè напаѓаат“,
рече Трендафилов во однос на денешната јавна седница што се одржа пред македонското собрание.
Прашан од што зависи дали тоа ќе биде протест или генерален штрајк, Трендафилов рече: „денот кога ќе одлучиме како ќе ги нападнеме, ќе биде денот кога истите овие 300 луѓе ќе одлучат да го повикаат народот на улица доколку не нè почитуваат онака како што заслужуваме“.
„Напаѓаат со сите средства, со тешка артилерија, и се надеваат дека ние ќе се криеме и нема да се браниме. За наша среќа, не сме почнале ниту да се браниме, а камоли да напаѓаме. Сметаме дека во една демократска држава, во едно демократско општество, една демократски избрана влада треба да ги почитува претставниците на работниците, без оглед дали сме убави или не сме. Треба да ги почитуваат претставниците на работниците и покрај тоа што не им се допаѓа тоа што го зборуваат, а тоа е потреба од зголемување на платите. Денеска политичари нè напаѓаат, затоа што бараме плата. Се надевам дека нема да биде обратно, ние да ги напаѓаме политичарите. Тоа што е опасно и што е преседан, е што владата се иззема во комплетниот случај од потребата за раст на платите и покрај тоа што таа е најголемиот работодавач во државатa“,
рече Трендафилов.
Во однос на најавите на Владата дека таа е подготвена да ги зголеми платите онака како што ќе се договорат работодавачите и синдикатите, Трендафилов, повикувајќи се на анализа на Меѓународната организација на трудот, рече дека Владата е соучесник во криминалот што се случува во Македонија.
„Близу 250 милиони евра работодавачите ја крадат државната каса со неуплаќањето на придонеси за задолжително социјално осигурување. Ова се податоци по анализа на Меѓународната организација на трудот со една независна тинк-тенк организација од Македонија и се јавно достапни податоци. За жал, експертите говорат дека близу 750 милиони евра сивата економија ја чини државата на годишно ниво“,
додаде тој.
Тој додаде дека овие податоци ги користат како синдикати имајќи предвид дека само врз основа на аргументи може да се разговара со спротивната страна.
„Не може само да удирате по масата и да бидете гласни и да мислите дека некој ќе ве слушне. Но, кога ќе треба да бидеме гласни, ние тоа го покажавме и на таков начин денеска го изразивме револтот на членовите на органите и телата на ССМ кои јасно и гласно им кажаа на пратениците она што тие не сакаат да го погледнат во медиумите, а тоа е дека работниците и граѓаните не се задоволни од владините политики во контекст на зголемување на нивните плати“,
рече Трендафилов.
Смета дека Владата, и покрај укажувањата од сите во државата, одлучила да води војна, односно, како што рече, на тоа се одлучиле „поединци во политичката партија ВМРО-ДПМНЕ, во некој таму таен кабинет“.
„Одлучија да водат војна против ССМ со објавување на нашите плати и на таков начин сметаат дека ќе го навлечат гневот на работниците“,
додаде тој.
Во однос на својата плата, Трендафилов рече „беше објавена некаква моја плата и на моите колеги“.
„Тоа што забораваат да го направат е при спинувањето и при изнесувањето на лагите користат бескурпулозни и безобразни мерки. Забораваат дека не сите претседатели на грански синдикати се вработени во синдикатите и примаат плата од синдикална членарина. Дел од претседателите на гранските синдикати се вработени во приватни компании и примаат плата“,
рече Трендафилов.
За овие податоци, тој рече дека веројатно јавниот обвинител ќе треба да се позанимава, имајќи предвид дека или се направил некаков упад во системот или нешто друго.
„Платата моја, на Слободан, е 60 000 денари. Поединци во ВМРО-ДПМНЕ кажуваат дека со 60 000 денари, претседателот на ССМ се луксузира, не знам што прави. За 60 000 денари си ја ставам главата во торба за борба за подобри плати на работниците. Кога видоа дека нема никаков контраефект, кон ССМ и кон мене како личност, излегоа на телевизија и кажаа дека платата ми била 75 000 денари и сум имал некакви приходи од неколку милиони денари, па си ги собираат, за 12, за 18 месеци и слично“,
кажа Трендафилов.