Интересот на институциите за исполнување на препораките за надминување на ризикиот од корупција во урбанизмот, просторното планирање и градежништвото е сѐ уште на ниско ниво, но постои зголемена активност на локалната и извршната власт за имплементација, покажало истражувањето на невладината „Транспаренси интернешнл“. Извештајот на организацијата за мониторинг на препораките е направен во периодот од април до јуни во рамки на нивниот проект „Проценка на ранливоста од корупција во државните институции и локални власти за просторно планирање, урбанизам и градежништво“. Преку состаноци со претставници на локалната власт, ДКСК и Министерството за транспорт и врски, биле констатирани почетни точки за надминување на ризиците од корупција во областите:
„Воспоставување комуникација и соработка помеѓу Министерството за транспорт и врски, ДКСК, Транспаренси Интернешанл – Македонија, Агенцијата за просторно планирање преку директни состаноци, назначување на лица за комуникација и одговорни за прибирање на информации.
Вклучување на општините и обврска за следење на напредокот во исполнување на препораките, како и повеќе обуки за општините во однос на промените на законите
Извештаите активно да се користат во на антикоруциската проверка на легислативата (АПЛ) и редовно да се доставуваат до ресорните министерства и до Владата“
се наведува во извештајот на „Транспаренси интернешнл“.
Од организацијата посочуваат дека големите дискрециони овластувања на локалната власт, недостигот на добро формулирани законски одреби, судир на законските одредби како и различното толкување на законските норми од една страна, но и честото менување на законите од друга страна создава ризик од зголемување на корупцијата.
„Во оваа насока потребна е зајакната соработка и координираност помеѓу Министерството за транспорт и врски, локалната власт, Заедницата на единиците на локалната самоуправа и Државната комисија за спречување на корупција за надминување на ризиците од корупција и усогласено изнаоѓање на решенија за спроведување на препораките“
препорачуваат од „Транспаренси интернешнл“.