Вкупната сума на пари што треба да ја плати Трамп е осум пати повисока од она што Керол го побарала во нејзината првична тужба
Поранешниот американски претседател Доналд Трамп треба да плати 83,3 милиони долари на новинарката и колумнистка Елизабет Џин Керол за јавните изјави што ги дал во 2019 година со кои ја омаловажувал и ги негирал нејзините наводи за силување, утврдила Федералната порота на судот во Менхетен, пренесува „Си-ен-ен“.
Поротата утврдила дека Трамп треба да и плати на Керол отштета од 18,3 милиони долари, од кои 11 милиони долари за нарушување на нејзината репутацијата и 7,3 милиони долари за претрпена емоционалната штета предизвикана од неговите изјави во 2019 година.
Трамп, како што утврдила поротата, треба да плати и 65 милиони долари казнена отштета за злонамерно дејствување при давање изјави за Керол.
Вкупната сума на пари што треба да ја плати Трамп е осум пати повисока од она што Керол го побарала во нејзината првична тужба.
По читањето на пресудата, Керол ги прегрнала своите адвокати.
Трамп, пак, ја осуди пресудата.
„Ова е апсолутно смешно. Целосно не се согласувам со двете пресуди и ќе поднесам жалба за целиот овој лов на вештерки во режија на Бајден, фокусиран на мене и на Републиканската партија. Нашиот правен систем е надовр од контрола и се користи како политичко оружје. Ова не е Америка“,
рече тој.
Минатиот мај, посебна деветчлената порота на сојузниот суд на Менхетен на поранешната новинарка ѝ додели отштета од пет милиони долари.
Керол (80) за време на судењето сведочеше дека Трамп (77) ја силувал во стоковната куќа „Бергдорф Гудман“ на Менхетен кон крајот на 1995 година или почетокот на 1996 година, а потоа ја нарушил нејзината репутација со тоа што во октомври 2022 година на неговата социјална мрежа напишал дека нејзините тврдења се целосна измама и лага.
Тогаш Трамп тврдеше дека Керол, поранешна колумнистка на магазинот „Ел“ и регистриран член на Демократската партија , ги фабрикувала наводите за да ја зголеми продажбата на нејзините мемоари од 2019 година и политички да му наштети.
Поранешниот претседател негираше и дека воопшто ја познава Керол.