Коментарите на американскиот претседател уследија откако палестинското милитантно движење Хамас најави дека ќе го одложи ослободувањето на заложниците на неодредено време обвинувајќи го Израел за кршење на договорот за прекин на огнот
Американскиот претседател Доналд Трамп доцна синоќа предупреди дека доколку сите Израелци кои се држат како заложници во Газа не бидат ослободени до сабота напладне, тој ќе предложи укинување на примирјето меѓу Израел и Хамас и ќе остави да „настане пекол“, пренесува „Гардијан“.
Трамп ова го кажа говорејќи пред новинарите во Овалната соба и додаде дека може да ја запре помошта за Јордан и Египет доколку овие земји не ги примат палестинските бегалци кои се иселуваат од Газа.
Коментарите на американскиот претседател уследија откако палестинското милитантно движење Хамас најави дека ќе го одложи ослободувањето на заложниците на неодредено време, обвинувајќи го Израел за кршење на договорот за прекин на огнот.
Оваа најава на Хамас беше повод израелскиот министер за одбрана да ја стави војската на земјата во состојба на готовс, со наредба да се подготви за „секое можно сценарио во Газа“.
Трамп ги оцени најавите од Хамас како ужасни и каже дека крајната одлука за тоа што треба да се случи со прекинот на огнот во Газа ќе ја остави во рацете на Израел.
„Но, што се однесува до мене, ако сите заложници не бидат вратени до сабота во 12 часот, мислам дека е соодветно време – би рекол да се откаже (примирјето) и нека избие пекол“,
рече Трамп, пренесуваат агенциите.
Ултиматумот на американскиот претседател би можел да стави крај на тринеделниот прекин на огнот кој наложува строг распоред за ослободување на израелските заложници во замена за стотина палестински затвореници кои се држат во израелските затвори.
Според Трамп, треба да бидат ослободени сите заложници, а не спорадично по неколкумина.
„Ние ги сакаме сите назад. Јас зборувам за себе. Израел може да го надмине тоа, но за мене, ако тие не се тука до сабота во 12 часот целиот пекол ќе избие“,
рече тој додавајќи дека не разговарал со израелскиот премиер Бенјамин Нетанјаху за временската рамка што ја предложил.
Прашан какви конкретни мерки ќе преземе доколку не биде спроведено неговото барање, американскиот претседател вели:
„Ќе дознаете. И тие исто така ќе дознаат. Хамас ќе дознае што мислам. Тоа се болни луѓе“
Тој не одговори директно на прашањето дали тоа ќе значи и американска воена интервенција или не.
Хамас, израелските и арапските власти веќе предупредија дека прекинот на огнот е на точка на кршење, а радикалната интервенција на Трамп може да ги поттикне стравувањата дека Вашингтон нема намера да продолжи со фазниот договор.
Хамас како причина за одложување на ослободувањето на заложниците го наведе прекршувањето на договорот од страна на Израел. Сепак, заканата на милитантната група да го прекине ослободувањето на заложниците доаѓа во заднина на сè потврдокорните позиции на САД и Израел за долгорочната иднина на Појасот.
Трамп, исто така, изјави дека може да ја запре помошта за Јордан и Египет, едни од најблиските сојузници на САД во регионот, освен ако тие не се согласат со неговиот план САД да ја „преземат“ Газа и да преселат милиони Палестинци во соседните држави, што би претставувало ефективно етничко чистење.
„Ако тие не се согласат, јас би го задржал тоа“,
рече Трамп.
Оваа негова закана дојде откако Египет претходно вчера отфрли секаков компромис што би ги нарушил правата на Палестинците.
Египетски безбедносни извори за Ројтерс изјавија дека мировните посредници стравуваат дека прекинот на огнот може да пропадне, поради што натамошните разговори се одложени додека не добијат јасен сигнал за намерите на Вашингтон за продолжување на договорот за примирје.
Инаку, Трамп претходно изјави дека неговиот план за преземање на Газа нема да вклучува право на враќање на повеќе од два милиони Палестинци за кои рече дека „немаат друга алтернатива“ освен да заминат поради уништувањето што го остави воената кампања на Израел.
„Сите ќе си заминат“,
одговори Трамп на парашањето што со Палестинците кои одбиваат да ја напуштат Газа.
Што се однесува до ослободување на заложниците од страна на Хамас, тоа беше закажано за в сабота и требаше да биде шесто во рамките на првата фаза од договорот за прекин на огнот.
Хамас треба да ослободи 33 заложници во текот на првата фаза од договорот, иако осум од нив се мртви. На списокот на оние што ќе бидат ослободени има жени, цивили и војници, потоа деца, болни и повозрасни мажи. Во замена, Израел се согласи да ослободи околу 1 900 палестински затвореници.
Досега се ослободени 16 Израелци, сите живи, а Хамас минатата недела ослободи и пет тајландски државјани, кои не беа вклучени во преговорите. Тие не беа вклучени во преговорите.