Дополнително, тој ја истакна својата желба за трансформација на Канада во американска сојузна држава, потенцирајќи дека и тоа би придонело кон зајакната национална безбедност. Најави и дека ќе го преименува Мексиканскиот Залив во Американски Залив
Новоизбраниот американски претседател Доналд Трамп изјави дека не ја исклучува можноста за употреба на воена или економска акција за преземање контрола врз Панамскиот Канал и Гренланд, велејќи дека контролата врз овие територии е од клучно значење за националната безбедност на САД. Тој ова го кажа на прес-конференцијата во својата резиденција Мар-а-Лаго на Флорида, втора по победата на изборите на 5 ноември.
На прашањето дали може да го увери светот дека нема да користи воена или економска принуда во обидите да ја добие контролата врз Панамскиот Канал и Гренлад, Трамп рече:
„Не, не можам да ве уверам за ниту едно од тие две. Но, можам да го кажам ова, тие ни се потребни за економска и национална безбедност.“
Гренланд, каде што се наоѓа голема американска база, е автономна територија на Данска, долгогодишен американски сојузник и една од земјите што го основаа НАТО. Трамп посочи дека ќе воведе царини за Данска доколку таа ја одбие неговата понуда за купување на Гренланд.
Данските власти, пак, претходно објавија дека територијата не е на продажба.
Дополнително, Трамп ја истакна својата желба за трансформација на Канада во американска сојузна држава, потенцирајќи дека и тоа би придонело кон зајакната национална безбедност. Најави и дека ќе го преименува Мексиканскиот Залив во Американски Залив.
Трамп се осврна и на НАТО-Алијансата, велејќи дека сите земји членки треба да потрошат пет отсто од својот Бруто-домашен производ (БДП) за одбраната, што е зголемување од сегашните два отсто.
Денешната прес-конференцијата на Трамп е втора откако победи на изборите на 5 ноември минатата година и следува еден ден откако Конгресот официјално ја потврди неговата победа.
Доналд Трамп официјално ќе ја преземе функцијата претседател на САД со неговата инаугурација закажана за две недели отсега, на 20 јануари.