Тој наведе дека царината ќе биде зголемена на 25 отсто, а како што истакна, новите мерки нема да се однесуваат на возилата произведени во фабриките во САД
Американскиот претседател Доналд Трамп денеска соопшти дека ќе ги зголеми царините за автомобили и камиони од Европската Унија на 25 отсто, тврдејќи дека европскиот блок не го испочитувал во целост трговскиот договор постигнат со САД.
„Со задоволство објавувам дека, со оглед на тоа што Европската Унија не го почитува нашиот целосно договорен трговски договор, следната недела ги зголемувам царините за автомобилите и камионите што доаѓаат во Соединетите Американски Држави“,
напиша Трамп на својата платформа Трут соушал.
Тој наведе дека царината ќе биде зголемена на 25 отсто, а како што истакна, новите мерки нема да се однесуваат на возилата произведени во фабриките во САД.
„Јасно е договорено дека, ако произведуваат автомобили и камиони во фабрики во САД, нема да има царини“,
додаде Трамп.
Тој додава дека многу фабрики за автомобили и камиони моментално се во изградба, со инвестирани над 100 милијарди долари, што, според него, е рекорд во историјата на производството на автомобили и камиони.
Според претходниот договор, ЕУ се согласи да ги укине царините за американската индустриска стока во замена за ограничување од 15 отсто на повеќето европски производи.
Меѓутоа, имплементацијата на договорот наиде на препреки, а европските законодавци сè уште не го ратификуваа договорот во целост. Како дополнителна точка на спорење се наведуваат и царините за метали, кои САД ги проширија на голем број производи, што предизвика обвинувања дека Вашингтон не ги почитува договорените обврски.