Трамп е сосема сигурен дека ќе биде републикански претседателски кандидат сега кога неговата последна противкандидатка Ники Хејли се откажа од трката по неговата убедлива победа на партиските прелиминарни избори досега
Поранешниот американски претседател Доналд Трамп, нарекувајќи ги „заложници“, вети дека ќе ги ослободи лицата затворени за учество во нападот на американскиот Капитол во 2021 година, како еден од неговите први чекори доколку биде реизбран.
Бунтовниците, кои тогаш ги поттикна на акција со лажни тврдења за изборна измама на последните претседателски избори, упаднаа во седиштето на американската демократија на 6 јануари 2021 година во обид да го спречат трансферот на власта од Трамп на Џо Бајден.
Од нив, 1 358 се обвинети во изминатите 38 месеци, покажуваат податоците на Министерството за правда објавени минатата недела.
Околу 500 од нив беа осудени на затворски казни.
Трамп го објави ова на платформата Трут сошал и вети дека ќе ја затвори границата со Мексико. Тоа, исто така, ќе биде еден од првите чекори што ќе ги преземе доколку биде реизбран.
Тој не соопшти никакви детали.
„Мојот прв потег како ваш следен претседател ќе биде затворање на границата… и ослободување на заложниците на 6 јануари кои се неправедно затворени!“,
напиша тој доцна во понеделникот.
Трамп претходно зборуваше за неговиот хипотетички прв ден на функцијата и вети за време на неговото појавување во декември дека нема да се однесува како диктатор освен првиот ден.
Ова не е првпат Трамп да ги нарече своите затворени поддржувачи „заложници“ или да предложи тие да бидат ослободени.
Тој го повика Бајден да ги ослободи
Во јануари тој го повика претседателот Бајден „да ги ослободи заложниците од 6 јануари“ за време на предизборниот митинг во Ајова.
Трамп се соочува со четири обвиненија за кривично дело, вклучително и едно федерално и едно во Џорџија, кои произлегуваат од неговите обиди да ги поништи изборните резултати откако загуби од Бајден.
Трамп е сосема сигурен дека ќе биде републикански претседателски кандидат сега кога неговата последна противкандидатка Ники Хејли се откажа од трката по неговата убедлива победа на партиските прелиминарни избори досега.
Трамп тврди дека поддршката што ја ужива во базата на републиканците е поголема, а не помала поради неговите многубројни проблеми со судството.