Освен што бара преиспитување на измените во Кривичниот законик, лидерот на Демократски сојуз во иницијативата до Уставниот суд бара Судот по службена должност да донесе времена мерка за одложување на примената на измените на КЗ до носењето конечна одлука по однос на иницијативата
Претседателот на Демократски сојуз (ДС), Павле Трајанов, денеска поднесе иницијатива до Уставниот суд со која бара да се преиспита уставноста на последните измени во Кривичниот законик (КЗ).
Иницијативата на Трајанов се однесува на измените во Кривичниот законик кои на почетокот на месецов беа експресно усвоени во Собранието, а со кои, меѓу другото, се предвидува намалување на казните за злоупотреба на службената положба и за злосторничко здружување.
Освен што ги оспорува измените во Кривичниот законик, лидерот на Демократски сојуз во иницијативата до Уставен бара Судот по службена должност да донесе времена мерка за одложување на примената на измените на КЗ до носењето конечна одлука по однос на иницијативата.
Во иницијативата до Уставниот суд, лидерот на Демократски сојуз укажува на обврската уставните одредби за владеење на правото и законите да важат подеднакво за сите, како и на потребата од заштита на државниот имот од злоупотреби на носителите на јавни функции.
Измените во Кривичниот законик, со кои, меѓу другото, се намалуваат казните од членот 353 за злоупотреба на службената положба и овластување и членот 354 за злосторничко здружување, повлекуваат застарување на некои од делата за кои се товарат обвинетите во случаите што ги отвори поранешното Специјално јавно обвинителство.