Освен за трагедијата во Кочани, на средбата се разговарало и за одблокирање на евроинтегративниот пат на земјава, а во таа насока двајцата заклучиле дека се неопходни позачестени средби. Во оваа смисла, претседателката рече дека се можни компромиси и оти очекува исчекор по однос на ова прашање
Трагедијата во Кочани била во фокусот на средбата на претседателката Гордана Сиљановска-Давкова со својот бугарски колега Румен Радев во рамките на состанокот „Акаба процес Балкан III“ во Софија, јави дописникот на МИА.
Оддавајќи му признание на Радев, претседателката истакна дека тој бил првиот претседател што ѝ се јавил утрото по трагедијата во Кочани и ѝ понудил секаков вид помош. Во изјавата за медиумите, Сиљановска-Давкова во оваа смисла ја истакна важноста од напливот на солидарност и хуманизам во овој, како што рече, ужасен свет.
Рече дека за време на престојот во Софија ги посетила повредените од пожарот во Кочани во болницата „Пирогов“.
„Ако бугарските граѓани во Софија, Пловдив, Варна со редови чекале за да дадат крв и да помогат, јас имав должност прво да ги посетам повредените во болницата. Немам зборови и за министерот за здравство кој ме дочека, и за директорот на болницата и за пофесорката којашто беше таму. Сретнав и македонски лекари кои работат во болницата. Имав прилика да ги видам и родителите. Добрата вест е дека има голем напредок, мислам дека уште поголем ќе биде деновиве“,
изјави претседателката додавајќи дека трагедијата ги зближува луѓето и оти граѓаните од обете страни нема да ја заборават солидарноста.
Освен за трагедијата во Кочани, на средбата се разговарало и за одблокирање на евроинтегративниот пат на земјава, а во таа насока двајцата заклучиле дека се неопходни позачестени средби. Во оваа смисла, претседателката рече дека се можни компромиси и оти очекува исчекор по однос на ова прашање.
„Заклучивме дека треба многу повеќе да се среќаваме и министрите и претседателите, но најважно е и вие новинарите и луѓето од културата, студентите, за да видиме дека бугарскиот напредок е и наш, дека регионалниот напредок е и наш. Ние ги претставуваме граѓаните, мојот легитимитет извира од граѓаните и јас како професорка по уставно право не можам да заборавам на теоријата на мандатот – дека имам право да го правам тоа за што сум добила мандат на изборите од граѓаните, но се разбира дека тука се можни компромиси јас очекувам да исчекориме“,
рече претседателката во изјава за македонските и бугарските медиуми во Софија.
Сиљановска-Давкова денеска во Софија учествуваше на состанокот на шефови на држави и влади на „Акаба Процес Балкан III“. Нејзината последна средба со бугарскиот претседател Румен Радев беше на маргините на Конференцијата за климатски промени-КОП29 во Азербејџан во ноември минатата година.