Сите предмети каде што претседател или член на судечкиот совет е Горан Бошевски се одложени до назначување нов судија. Во таа група се и предметите „Шпански скали“ и „Талир 1“
Денешното рочиште за случајот „Траекторија“, за постапката за избор на компанија за изградба на автопатиштата Миладиновци – Штип и Кичево – Охрид, не се одржа.
Сите предмети каде што претседател или член на судечкиот совет е Горан Бошевски се одложени до назначување нов судија, информираат од Основниот кривичен суд.
За одложувањето на рочиштето на „Траекторија“, како што информираат од Кривичниот суд, биле известени сите странки во постапката.
Случајот „Траекторија“ се води против ексминистерот за транспорт и врски Миле Јанакиески, поранешниот вицепремиер Владимир Пешевски и ексдиректорот на ЈП за државни патишта Љупчо Георгиевски, како и против поранешниот премиер Никола Груевски.
Според обвинението, чиј застапник е обвинителката Лиле Стефановска, обвинетите, во втората половина на 2012 година и во текот на 2013 година, презеле повеќе дејства со кои во постапката за избор на компанија за изградба на автопатиштата Миладиновци – Штип и Кичево – Охрид ги искористиле и ги пречекориле своите овластувања. Со тоа му нанеле штета на буџетот од најмалку 155 милиони евра.
Нови членови на судечкиот совет, ќе треба да бидат назначени и во предметите „Шпански скали“ и „Талир 1“, каде што Бошевски е член.
Случајот „Талир 1“, кој се однесува на незаконско финансирање на партијата ВМРО-ДПМНЕ, го води судијата Осман Шабани, но ќе треба да биде назначен нов член на судечкиот совет на местото на Бошевски.
Претседател на судечкиот совет за предметот „Шпански скали“ е судијата Владимир Туфегџиќ, кој сега ќе треба да добие нов член на судечкиот совет.
Судскиот совет, на седница овој месец, разреши судија, „поради нестручно и несовесно вршење на судиската функција“ . Од Судскиот совет информираа дека името на судијата ќе биде објавено кога одлуката ќе биде потврдена од Врховниот суд.