„Дали тоа ќе оди преку Владата или поради потребата од итност ќе оди преку некој пратеник од Собранието, службите работат на предлог-законските измени и тие најбрзо што може ќе бидат ставени во процедура“, изјави денеска министерот за внатрешни работи
Ќе се носи нов закон со кој ќе се регулира употребата на пиротехнички средства и со кој ќе биде забранета нивна употреба во објекти од затворен тип, изјави денеска министерот за внатрешни работи Панче Тошковски.
Вакво задолжение Министерството доби од Владата по трагедијата во т.н. кабаре клуб во Кочани, каде што како непосредна причина за пожарот кој однесе 59 човечки животи се посочува употребата на пиротехнички средства – прскалки за време на концерт.
Актуелниот закон кој ја регулира оваа материја, како што рече Тошковски, е од 1978 година.
Сепак, додека да биде готов новиот закон, поради итноста на ситуацијата, министерот рече дека ќе се оди на измени на актуелниот и дека службите веќе работат на нив.
„Се констатира дека за да одиме со таков тип забрана потребно е да се изврши измена на законската одредба. За жал, тој закон е од 1978 година, ако не се лажам и ќе следува негово обновување со нов закон. Целокупниот законски текст поврзан со предметниот закон мислам дека е при крај, но сега ќе дејствуваме поради потребата од итност со директна измена на одредени членови во рамките на постоечкиот закон. Дали тоа ќе оди преку Владата или поради потребата од итност ќе оди преку некој пратеник од Собранието, службите работата на предлог-законските измени и тие најбрзо што може ќе бидат ставени во процедура“,
изјави Тошковски.
Државниот јавен обвинител Љупчо Коцевски на денешната прес-конференција, споделувајќи детали за отворената истрага за пожарот во Кочани, рече дека осомничените одговорни лица во дискотеката и членови на обезбедување не спречиле за потребите на настапот на групата ДНК во угостителскиот објект да се внесат и да се употребат експлозивни материи – пиротехнички фонтани. За тоа, како што наведе јавниот обвинител, тие немале задолжителна дозвола издадена од надлежни органи за да ракуваат со пиротехнички средства ниту, пак, просторните услови дозволувале употреба на такви пиротехнички средства.
За внесувањето и употребата на пиротехниката за време на настапот, како што додаде Коцевски, осомничен е и еден од членовите на музичката група. Според обвинителот, постои сомнение дека членовите на бендот околу 2:32 часот на 16 март ја активирале пиротехниката како дел од сценскиот настап, при што, од искрите кои се исфрлале во правец на плафонот над сцената, веднаш се опожарил кровниот дел на објектот, а пожарот почнал да се шири.
Основното јавно обвинителство Кочани отвори истрагата против 27 лица и три фирми во врска со трагедијата клубот во Кочани каде што животите ги загубија 59 лица, а речиси 200 се повредени. Во рамките на истрагата осомничени се од управители, закупци, сопственици на клубот, до поранешен министер, функционери и вработени во Министерството за економија, Државниот пазарен инспекторат, тројца градоначалници на Кочани (еден актуелен во оставка и двајца поранешни), како и член на бендот ДНК и вработени во Агенцијата за обезбедување што била ангажирана во локалот.
Во одвоена истражна постапка што ја отвори Основното јавно обвинителство за гонење на организиран криминал и корупција (ОЈО ГОКК) осомничени се седум високи полициски службеници, кои, исто така, се товарат за незаконско постапување во врска со лиценцата што му била издадена на клубот во Кочани. На нив Основниот кривичен суд Скопје во средата веќе им одреди 30-дневен притвор.
Со полициските службеници вкупниот број на досега осомничени за трагедијата во Кочани е 34 физички и три правни лица.