„Негде приближно бројката која во континуитет ја имале како бројка за производство во Министерството е околу 50 000 пасоши на месечно ниво. Бројката што сакаме да ја достигнеме, реална бројка, е некаде околу 75 000 пасоши на месечно ниво“, вели Тошковски во интервју за МИА
Вкупниот број лични документи кој е потребно да се заменат е некаде приближно околу два милиона, а нашата цел е да успееме да постигнеме бројка од 75 000 пасоши кои би се издавале на месечно ниво. Гледаме да дојдеме на некоја максимална бројка од 3 300 пасоши коишто би се произведувале на ден, тоа е максимална бројка ако произведуваме пасоши без да има никаков застој во текот на денот, вели во интервју за МИА. Панче Тошковски, министер за внатрешни работи во техничката влада.
„Сега да не се правиме ние дека сме не знам што, но сето она време кое што можам да го дадам за да подобриме нешто во процес во наредниот период којшто ни останува, 70 и некој ден до избори, па и она време по избори, овој процес нема да застане за време на избори, ќе го дадам заедно со целокупниот тим којшто е околу мене, заедно со сите оние коишто се добронамерници и во рамки на Министерството и во однос на ова прашање. Негде приближно бројката што во континуитет ја имале како бројка за производство во Министерството е околу 50 000 пасоши на месечно ниво. Бројката што сакаме да ја достигнеме, реална бројка, е некаде околу 75 000 пасоши на месечно ниво“,
вели Тошковски.
Презакажувањето, појаснува тој, ќе се прави така што на 20 дена ќе се прави прочистување на списоците. Тоа значи дека ако претходно некој имал термин на 15 декември, сега ќе има термин крај на април.
Соработката со дополнителниот заменик-министер Митко Бојмацалиев, Тошковски ја оценува како коректна, за разлика од, како што вели, незаконитоста во работењето на Владата.
„Нормално е да имаме несогласувања за одредени теми од аспект дали јас имам право сам да потпишувам или тој смета дека немам право да потпишувам – тоа е најнормално, но имаме коректна соработка и се надевам дека истата ќе продолжи така. Морам да изразам огромна загриженост за незаконитоста во работењето на Владата заради тоа што Владата е таа која што треба да пресече и сите одлуки коишто ги носи, ги носи незаконски“,
посочува Тошковски.
Техничката влада, според Тошковски, функционира катастрофално и укажува дека основните законски обврски кои што треба да ги почитува, не ги почитува.
„Целосно без никакво правно и суштинско образложение, само за СВР Тетово да не ми дозволи да поставам јас дополнителен началник којшто ќе биде по мој избор, а дополнителниот да постави дополнителен началник којшто ќе биде по негов избор. Тоа е прв факт кај што направиле катастрофален фаул и за којшто детално ги информирам сите претставници на меѓународна заедница и истите морам да кажам дека изразуваат огромна загриженост на демократскиот капацитет на оваа држава во делот на спроведување на фер и демократски избори“,
изјави Тошковски.
Тошковски очекува мирен изборен ден, како што доликува на една европска земја.
„Јас се надевам на многу мирен и културен изборен ден, како што доликува на една европска земја и се’ ќе сторам не само сам, не само сам, јас таму не сум авторитарен владетел во Министерството, таму има дополнителен технички министер, таму има заменик-министер и многу битно има директор на Бирото за јавна безбедност којшто на тој Оперативен штаб којшто треба да се создаде во текот на оваа недела е носителот на златна команда. Сакам да верувам дека сите овие луѓе заедно со мене ќе дадеме максимум и дека овој процес на фер и демократски избори на денот на гласањето ќе се истера како што треба, како во прв круг претседателски, така и во втор круг претседателски заедно со парламентарните“,
вели министерот за внатрешни работи.
На средбите со амбасадорите, Тошковски посочува дека, освен за пасошите, е истакнат и фактот дека Владата, како што вели, работи незаконски.
Во однос на секојдневното гостување на телевизии, Тошковски вели дека не му годи публицитетот, но и дека јавноста треба да биде информирана.