Се очекува температурите во Грција до петок да достигнат до 43 Целзиусови степени, а надлежните министерства објавија мерки за заштита на граѓаните, меѓу кои можност за работа од дома за државните службеници, но и за вработените во приватниот сектор, доколку е изводливо
Училиштата и градинките во повеќе општини во Грција, меѓу кои и Атина, се затворени, а државните службеници може да работат од дома поради топлотниот бран што ја зафати земјата, а се очекува утре да кулминира. Исто така, денеска и утре во периодот од 12 до 17 часот затворен за посетители ќе биде и Акрополот, пренесуваат грчките медиуми.
Според извештајот од Националната метеоролошка служба (EMY), се очекува да продолжат високите температури од над 40 Целзиусови во внатрешноста на грчкото копно, главно во централните и јужните региони кои се и со најголем ризик од пожари.
Се очекува температурите во Грција до петок да достигнат до 43 степени Целзиусови, а надлежните министерства објавија мерки за заштита на граѓаните, меѓу кои можност за работа од дома за државните службеници, но и за вработените во приватниот сектор, доколку е изводливо.
Според порталот „Метео“ на Националната опсерваторија во Атина, утринава 63 од вкупно 502 метеоролошки станици во Грција регистрирале температури над 30 степени, додека пак на островите Наксос, Родос и Крит во 8.10 часот утрово температурата била од 32,3 до 34,6 степени Целзиусови.
Според грчките метеоролози ова е првиот топлотен бран во првата половина на јуни во последните најмалку 50 години. Топлотните бранови порано се случувале во јули и август, но од 2007 година наваму, тие се и во јуни и сега се повторуваат на секои две до три години.
Поради високите температури, зголемена е и опасноста од пожари.