Апелација вели дека Кривичен не чекал да помине рокот од 15 дена за жалби, па затоа го вратила предметот
Случајот „Титаник 2“ заглави во судските процедури во период кога се одбројуваат деновите до застарувањето на делото на Сашо Мијалков, неправосилно осуден на две години затвор.
Предметот стигнал до Апелацискиот суд, но оттаму го вратиле во Основниот кривичен суд бидејќи, како што тврдат оттаму, Кривичен предвреме им го испратил односно пред да истече рокот за жалби на обвинетите.
Имено, првостепената пресуда за „Титаник 2“, Основниот кривичен суд ја изрече на 23 јануари годинава, потоа пресудата беше изготвена и доставена до странките, по што почна да тече рокот од 15 дена за жалби.
„Последната достава на првостепената пресуда е со прием од обвинет на 02.03.2023 година, што значи рокот за поднесување жалба отпочнал да тече на 03.03.2023 година и рокот во кој обвинетиот може да го искористи правото на жалба истекува на 17.03.2023 година.Согласно одредбата од член 420 став 2 од Законот за кривична постапка е предвидено дека жалбата и одговорот на жалбата со сите списи, првостепениот суд во рок од три дена од приемот на одговорот на жалбата, односно по истекот на рокот за поднесување одговор на жалбата, ќе ги достави до второстепениот суд“,
велат од Апелација.
Од тие причини, појаснуваат, предметот административно го вратиле во Кривичен кој треба да им го испрати одново откако ќе истечат роковите за жалба и одговор на жалба.
„Титаник 2“ се однесува на договарање за гласање за приговори во корист на ВМРО-ДПМНЕ за локалите избори во 2013 година во Струмица. Пресудата која беше изречена на 23 јануари е втора што ја донесе Основниот кривичен суд. Првата беше донесена во март 2019, но Апелација ја укина и го врати предметот на повторно судење.
Мијалков со втората првостепена пресуда беше осуден на две години затвор за делото примање наградата за противзаконито влијание. Меѓутоа, делото застарува за помалку од еден месец, па извесно е дека до тогаш Апелација нема да стигне да се изјасни за жалбите со што тој ќе се спаси од евентуална одговорност.
Покрај Мијалков, во „Титаник 2“, со втората првостепена пресуда на двегодишни затворски казни осудени се и лидерот на ДПА, Мендух Тачи, и четворица поранешни членови на ДИК (Бедредин Ибраими, Анета Стефановска, Влатко Сајковски и Сашо Срцев), меѓутоа тие се за друго дело – повреда на избирачкото право.