„Насилникот континуирано физички ја напаѓал жената, на која ѝ нанел повеќе скршеници и други повреди. Кај помалото дете со тепање предизвикал хематом на црниот дроб, контузии со хематоракс на белодробно десно крило, лузни на лицето и отсуство на заби во устата, додека кај постарото предизвиканите тешки телесни повреди се животно загрозувачки скршеници на коски на череп. Со тешкото семејно насилство сакал да ги натера парите од просење да му ги носат нему“, соопшти Обвинителството
Основното јавно обвинителство Скопје донесе наредба за спроведување истражна постапка против едно лице за кое постои основано сомнение дека сторило две продолжени кривични дела – тешка телесна повреда по член 131 со став 2 и став 1 и едно продолжено кривично дело – тешка телесна повреда по член 131 став 3 во врска со став 2 и став 1 од Кривичниот законик.
Како што соопшти вечерва Јавното обвинителство, во период од 4 до 7 месецов, во семејниот дом во Визбегово, осомничениот 24-годишник со умисла во повеќе наврати вршел семејно насилство и со тупаници, клоци и тврд предмет ѝ нанел тешки телесни повреди на оштетената негова вонбрачна партнерка и нејзините две малолетни деца на возраст од 10 и 4 години.
„Тој континуирано физички ја напаѓал жената, на која ѝ нанел повеќе скршеници и други повреди. Кај помалото дете со тепање предизвикал хематом на црниот дроб, контузии со хематоракс на белодробно десно крило, лузни на лицето и отсуство на заби во устата, додека кај постарото предизвиканите тешки телесни повреди се животно загрозувачки скршеници на коски на череп. Со тешкото семејно насилство сакал да ги натера парите од просење да му ги носат нему“,
се наведува во соопштението на Обвинителството.
Јавниот обвинител до судијата на претходна постапка доставил предлог за определување мерка притвор за осомничениот.
По целосно прибирање на доказниот материјал, информира Обвинителството, не е исклучена можноста и за потешка правна квалификација на делото.