Судија во Апелациониот суд во Скопје, кој бил дел од кривичниот совет кој го пушти Мијалков од притвор пред неколку дена, го прекинал боледувањето за да може да гласа и на новата, вчерашна седницата на кривичниот совет по кој екс-шефот на УБК беше пуштен од притвор, објави телевизија Телма.
Од скопска Апелација за телевизијата потврдиле дека судијата по електронска пошта на 23-ти ноември (ден по првата одлука за укинување на притворот) го известил судот и надредените дека има висока температура и затоа матичниот лекар му отворил боледување на неопределено време.
Но вчера апелациониот судија се вратил во судот и пријавил дека го прекинал боледувањето поради тоа што проценил дека здравствената состојба му е подобрена.
Веднаш се зафатил со работа во кривичниот совет кој попладнево донесе одлука за укинување на притвор на Сашо Мијалков на кого му беше определен притвор поради дводневно бегство на почеток на годината.
Целата вест може да ја прочитате ТУКА.
Кога пред една недела Мијалков првично беше пуштен од притвор со одлука на скопска Апелација, имаше бројни реакции од страна на власта и особено, од министерот за правда Бојан Маричиќ. Првиот човек на овој ресор, тогаш кажа дека одлуката ја намалува и онака разнишаната доверба на граѓаните во судовите, но отиде и дотаму што ги именуваше судиите кои гласале „За“.
Така, можеше да се состави слика дека во тричлениот совет, двајцата судии кои гласале „За“ Мијалков да излезе од притвор со гаранција биле Ѓоко Ристов и Енвер Беџети. Маричиќ не го спомена третиот член на кривичниот совет, судијката Тања Милева, за која се проширија неофицијални информации дека била против Мијалков да излезе од притвор.