Упатувајќи честитки по повод националниот ден, министерот Османи за време на телефонскиот разговор со украинскиот колега Дмитро Кулеба изразил поддршка за борбата на украинскиот народ, која воедно претставува борба за нашите заеднички современи и демократски вредности, како и заштита на меѓународниот поредок
Инаку, денеска Украина одбележува 31 година од прогласувањето независност на земјата. Денот на независноста на Украина – 24 Август ќе биде одбележан и кај нас од страна на Амбасадата на Украина во Република Северна Македонија и Здружението на Украинци во земјава, „Лесја Украинка“
Министерот за надворешни работи Бујар Османи денеска телефонски разговарал со својот колега, украинскиот министер за надворешни работи Дмитро Кулеба по повод одбележување на Денот на независноста на Украина.
„Упатувајќи искрени честитки по повод националниот ден, министерот Османи изрази поддршка за борбата на украинскиот народ, која воедно претставува борба за нашите заеднички современи и демократски вредности, како и заштита на меѓународниот поредок“,
соопшти Министерството за надворешни работи.
За време на телефонскиот разговор со Кулеба, шефот на македонската дипломатија истакнал дека во овие тешки времиња за украинската и европската безбедност, Северна Македонија изразува силна поддршка за Украина и солидарност со украинскиот народ во нивната борба за враќање на мирот и надминување на последиците од руската агресија.
„Украинците, бранејќи ја својата татковина, се борат не само за својата слобода, туку и за слободата на целокупниот демократски свет и споделените европски вредности“,
истакна Османи.
Од МНР наведуваат дека и во оваа пригода министерот Османи ја реафирмирал нашата цврста и бескомпромисна поддршка за суверенитетот и територијалниот интегритет на Украина, притоа упатувајќи силна осуда за руската воена инвазија која е грубо кршење на меѓународното право и обид да се поткопаат темелите на европската и глобалната сигурност и стабилност.
„Во тој контекст, нагласи дека Северна Македонија, како членка на НАТО-Алијансата има преземено низа чекори и мерки како одговор на руските воени дејствија“,
информира Министерството за надворешни работи.
Османи и Кулеба, како што е наведено во соопштението, разговарале и за европските перспективи на двете држави, особено од аспект на безбедносните импликации за европскиот континент, но и пошироко, а во контекст на новата геополитичка реалност.
Инаку, денеска Украина одбележува 31 година од прогласувањето независност на земјата.
Денот на независноста на Украина – 24 Август ќе биде одбележан и кај нас од страна на Амбасадата на Украина во Република Северна Македонија и Здружението на Украинци во земјава, „Лесја Украинка“.
Како што соопшти украинската амбасада, според програмата, предвидено е поставување светски рекорд за изведување на националната химна на Украина истовремено во 50 земји во светот и формирање жив синџир во рамки на глобалната иницијатива „The free world gathering“.