Побарав официјално забелешка бидејќи се работи за универзитетски професори. Кога тие ќе го достават својот став за техничката грешка, веднаш ќе го изнесеме одговорот до јавноста и до наставниците, вели министерот за образование и наука
Министерството за образование и наука побарало од авторите на учебникот по математика за шесто одделение да достават забелешка за грешката што ја има во една задача по геометрија, а за која изминатите денови имаше реакција од професорка по математика.
„Што се однесува за таа забелешка, во однос на предметот математика за шесто одделение, техничката грешка е на почитуваните автори. Има и неколку решенија странично од задачата. Јас побарав официјално забелешка бидејќи се работи за универзитетски професори. Кога тие ќе го достават својот став за техничката грешка, веднаш ќе го изнесеме одговорот до јавноста и до наставниците“,
изјави денеска министерот за образование и наука Јетон Шаќири одговарајќи на новинарско прашање колку изнесува збирот на аглите во еден триаголник.
Според Шаќири, и претходните години во учебниците по математика имало по некоја грешка.
„Има една изрека дека и на најдобриот математичар студентот му има најдено грешка во учебникот“,
рече министерот.
Од рецензентите и професорите, Шаќири вели дека побарал да бидат повнимателни со учебниците и најави дека кога ќе го добие одговорот од нив ќе ја извести јавноста.
Грешката во задачата по геометрија, која се наоѓа на 162. страница во учебникот за шесто одделение, ја објави Фросина Митрушева, професорка по математика од скопската гимназија „Раде Јовчевски – Корчагин“. Таа во објава на својот фејсбук-профил вели дека збирот на сите агли во секој триаголник е 180 степени, а не како што може да се види во задачата, дека тоа е 190 степени.
На новинарско прашање во врска со проблемот со странските учебници кој трае веќе подолго време, Шаќири рече дека и во претходниот период се отворило дискусија во однос на начинот на пријавување на странските издавачи, како и за издавачкото право што го имаат, на повикот организиран од Министерството за образование и наука, на кој по измените, односно на вториот повик, пристап имаа сите странски издавачи.
Тој вели дека, во однос на странските учебници, има побарано стручно мислење и од Заводот за ревизија во однос на толкувањето на Законот за учебници.
„Го очекувам одговорот и за наредните чекори сакам внимателно, ако извештајот кажува дека ќе треба да се дефинира, јас ви гарантирам дека после шест години ќе имаме добро дефинирање на законот и очекувам политичките партии тука да не прават проблем и ова да се реши во најбрз можен рок според препораките што ги имаме“,
рече Шаќири.