Наум Колев (47) и неговиот син Доне (23) од струмичкото село Мокриево се убиени во Швајцарија во местото Соренс, во кантонот Фрибург, пренесува МИА. Нивните тела вчера биле пронајдени на фарма за коњи покриени со арско ѓубре, објавија швајцарски медиуми, а веста ја потврдиле и жители на селото Мокриево.
Според швајцарскиот интернет-портал „20 минути“, „татко и син, на возраст од 47 и 23 години, населени во кантонот Вауд, биле пронајдени мртви во регионот на Соренс. Тие веројатно биле убиени од огнено оружје, проценува кантоналната полиција на Фрибург“, пишува овој портал.
Колеви петнаесетина години живееле во Швајцарија и важеле за мирни и работливи луѓе. Според струмичани што живеат таму, таткото и синот заминале во вторникот навечер од својот дом за да си ги повлечат дадените пари за купување земјоделска механизација.
Според швајцарски медиуми, осомничен е 30-годишен маж, кој е уапсен и ја признал вмешаноста во убиството. При претресот, кај него било пронајдено огнено оружје, а полицијата треба да ги утврди точните околности под кои биле убиени таткото и синот.