За денешниот случај со неиспуканиот куршум пронајден пред домот на Таравари осуда стигна и од неговите сопартијци, со кои изминатите денови се во отворен раздор околу учеството на Алијанса за Албанците на претстојните избори
Лидерот на СДСМ, Димитар Ковачевски, денеска изјави дека го загрижуваат информациите за пронајдениот неиспукан куршум пред куќата на претседателот на Алијанса за Албанците и актуелен градоначалник на Гостивар, Арбен Таравари
Како што денеска видовте во медиумите, денеска кај мене дома полициски екипи вршеа увид затоа што пред мојот дом е пронајден куршум, со јасна мафијашка заканувачка порака. Ова попладнево на својот фејсбук-профил го напиша Арбен Таравари, актуелниот градоначалник на Гостивар и лидер на Алијанса за Албанците, откако утринава од Секторот за внатрешни работи во Тетово информираа дека пред неговата куќа во Гостивар е пронајден неиспукан куршум од автоматско оружје.
Од СВР Тетово соопштија дека утринава пред влезната врата на 50-годишниот А. Т. од Гостивар било оставено, односно пронајдено зрно од автоматско оружје калибар 7,62 милиметри.
„Жал ми е за моето семејство, а особено за мајка ми која особено лошо ја доживеа оваа ситуација. Жал ми е за оние политичари кои покажуваат дека нивниот аргумент за премолчување на нечиј глас се куршуми, куршуми кои ме потсетуваат на Италија од 1992 година кога мафијата го уби познатиот судија Џовани Фалконе. За тоа ми е жал, но тука завршува моето жалење и почнува мојата радост, затоа што разбирам дека тие што ја држеа оваа земја во заложништво, се во очај од пораз“,
вели Таравари.
Според него, во голема неволја е секој што кога ќе му снема зборови, му останува само куршум.
„Кој и да го испукал тој куршум, му велам: ‘И да пукате тешка артилерија, промената започна и нема да запре’. Можете да ме убиете, а тоа би била голема загуба за моето семејство и жал ми е што и моите деца го читаат ова. Но, ти би убил само еден човек, што ќе правиш со илјадниците, стотици и милиони луѓе кои веќе се кренати на нозе? Не можеш да молчиш, да убиеш, да запреш народ. Ви благодарам на сите што ме поддржувате! Го правите моето срце планина! Промената ја започнавте со мене или без мене. Промената е готова!
напиша Таравари на Фејсбук.
За денешниот случај со неиспуканиот куршум пронајден пред домот на Таравари осуда стигна и од неговите сопартијци, со кои изминатите денови се во отворен раздор околу учеството на Алијанса за Албанците на претстојните избори.
Лидерот на СДСМ, Димитар Ковачевски, денеска изјави дека го загрижуваат информациите за пронајдениот неиспукан куршум пред куќата на претседателот на Алијанса за Албанците и актуелен градоначалник на Гостивар, Арбен Таравари.
Доколку е точно дека пред домот на Таравари бил оставен куршум, Ковачевски рече дека во тој случај Министерството за внатрешни работи треба да интервенира, како што тоа беше случај по вчерашниот физички напад на директорот на Агенцијата за управување со одземен имот Дритон Небиу, кој доаѓа од редовите на Алијанса за Албанците (АА).
Директорот на Агенцијата за управување со одземен имот Дритон Небиу синоќа беше физички нападнат додека со семејството вечерал во еден познат тетовски ресторан, а настанот го потврди полицијата.
Двата инцидента доаѓаат по превирањата и длабоките разлики во врвот на Алијанса за Албанците, која е дел од актуелното парламентарно мнозинство и Владата, за тоа како и со кого да се настапи на претстојните парламентарни избори.
Алијанса за Албанците изминатите денови е во центарот на вниманието откако во саботата Фејсбук стана арената во која првенците на Алијанса за Албанците ги потврдија шпекулациите за длабоките разлики во врвот на партијата за тоа како и со кого да се настапи на претстојните парламентарни избори.
Лидерот на Алијанса за Албанците Арбен Таравари на Фејсбук напиша дека бара поддршка од Централното собрание за да им се приклучат на опозициските партии на Албанците.
На ова реагираше генералниот секретар на АА и министер за правда Кренар Лога, кој напиша оти партијата веќе одлучила дека на изборите ќе оди самостојно. Му се приклучи претседателот на Централното собрание и поранешен лидер на Алијанса за Албанците, Зијадин Села, кој го обвини Таравари дека има шверцерски тенденции и напиша дека тој како поединец не одлучува за чекорите на партијата, туку партиските тела.