Министерот информираше дека на пациентот од 1 април му откажале бубрезите поради што бил ставен на дијализа, а главниот проблем уште од почетокот била инфекцијата на раните од изгорениците кои зафаќале 40 проценти од површината на неговото тело
Министерот за здравство утрово потврди дека едно лице кое беше на лекување во Литванија починало како последица од здобиените повреди во пожарот во т.н. кабаре „Пулс“ во Кочани.
Таравари не го соопшти неговиот идентитет и кажа дека овие информации ќе бидат кажани на прес-конференцијата закажана за 13:30 часот.
Сепак, говорејќи за пациентот за кој рече дека бил во најкритична состојба заедно со уште тројца повредени, министерот кажа дека името на лицето кое починало утрово е Александар.
Според првичните информациите, станува збор за Александар К., управителот на т.н. кабаре „Пулс“ во Кочани, кој беше и еден од осомничените во истрагата за трагедијата.
Со смртта на пациентот кој се лекуваше во Литванија, билансот на загинати во трагедијата сега е 60 лица.
Информацијата за смртта на пациентот, Таравари рече дека ја добил утрово пред да тргне за Липково, каде што беше во посета на тамошната болница.
Министерот соопшти дека на пациентот од 1 април му откажале бубрезите поради што бил ставен на дијализа, а главниот проблем уште од почетокот била инфекцијата на раните од изгорениците кои зафаќале 40 проценти од површината на неговото тело.
„Пациентот што почина, само информативно да кажам, 40 проценти од телото му беше со изгореници. Од почетокот главниот проблем беше инфекцијата што ја доби поради огромен број, огромна површина на рани коишто ги имаше на телото“,
рече Таравари.
Починатиот, како што рече тој, бил во најтешка состојба од четворицата најкритични пациенти што се наоѓаат на лекување во странство.
„Четворица пациенти се во критична состојба, Александар кој почина утрово, беше најтешкиот од тие четири пациенти. Да се надеваме дека другите три-четири да… иако во секој случај може да има флуктуации во здравствената состојба и на потешки пациенти коишто се надвор од државата, меѓутоа веќе не се повеќе од 15 пациенти интубирани, другите се екстубирани и тоа е добра прогноза, меѓутоа ајде да почекаме додека ни се вратат сите во државата“,
рече министерот за здравство, кој повеќе информации најави на прес-конференција попладне.
За трагедијата во т.н. кабаре во Кочани, локалното Основно јавно обвинителство веќе отвори истрага во која се осомничени вкупно 27 физички и три правни лица. На 21 лице им е одреден ефективен затворски притвор притвор од 30 дена, додека тројца осомничени добија куќен притвор. На тројца осомничени не им беа одредени никакви мерки бидејќи се наоѓаат на лекување.
Во одделна истрага, исто така, поврзана со пожарот во Кочани, што ја отвори Основното јавно обвинителство за гонење организиран криминал и корупција (ОЈО ГОКК) во притвор завршија седум поранешни високи полициски службеници од Штип и Кочани.
Изнесувајќи ги првичните детали околу отворената истрага државниот обвинител Љупчо Коцевски на 21 март рече дека тројца од вкупно 27-те осомничени физички лица се јавуваат како одговорни лица, косопственици или управители во извесен период во правното лице, чија подружница е т.н. кабаре-клубот „Пулс“.
Според регистарот на Министерството за економија и податоците во Централниот регистар, носител на лиценците за кабаре – легални и фалсификуваната, е фирмата „ММММ кафе“ ДООЕЛ од Кочани, чиј сопственик и управител е Александар Карадакоски.
Инаку, за вистински сопственик на т.н. кабаре се смета Д.Ј., во чиј дом, возило и два угостителски објекти во рамки на истрагата се вршени претреси.