„Нема стручна грешка, да имаше, веднаш ќе бевте известени и ќе се преземеа чекори за дисциплински мерки. Меѓутоа и ДСЗИ и стручната комисија од Министерството за здравство констатира дека нема лекарски пропуст“, вели министерот за здравство
Нема лекарски пропуст во врска со смртта на новородените близначиња што починаа во болницата во Прилеп во јануари годинава, вели министерот за здравство Арбен Таравари.
Таравари ова го изјави одговарајќи на новинарски прашања по посетата на болницата во Прилеп.
„Нема стручна грешка, да имаше, веднаш ќе бевте известени и ќе се преземеа чекори за дисциплински мерки. Меѓутоа и Државниот санитарен и здравствен инспекторат и стручната комисија од Министерството за здравство констатира дека нема лекарски пропуст“,
изјави министерот за здравство.
Претходно, Државниот санитарен и здравствен инспекторат (ДСЗИ) на 22 јануари соопшти дека ќе бара да се спроведе постапка за утврдување дисциплинска одговорност кај здравствените работници кои учествувале во лекувањето и исписот на новороденчињата близначиња од прилепската болница што починаа на 16 јануари.
Близначињата, како недоносени, биле родени спонтано на 30 декември 2024 година, во 34-тата гестациска недела. На барање на мајката, бебињата биле испишани од болницата на 10 јануари, а починаа шест дена подоцна.