Во интервју за „360 степени“ на МРТ 1, министерот за здравство зборува за процесот на функционално фузирање на одделните клиники во еден ентитет, како и за капиталните инвестиции во овој ресор – тековни и идни
360°: До каде сте со реализација на идејата наведена и во програмата за работа на Владата за, како што велите, функционално фузирање на клиниките во рамките на Клиничкиот центар?
Таравари: Да, тоа е интегрирање на Клиничкиот центар и интегрирање на здравствени домови и болници. Работна група веќе интензивно работи во Министерството за здравство за да се интегрира. Видете, за дезинтеграцијата што се случи 2007 година требаше повеќе од една година, за да се одделат сите клиники. Сега за спојувањето на сите клиники во еден клинички центар, секако, ќе ни треба време.
360°: Вие велите јануари 2026 г.
Таравари: Да започнеме, тоа е најоптимистички – 1 јануари 2026 г. да започне да функционира заедно Клинички центар, тоа ќе биде извонреден успех на оваа влада.
360°: А зошто сметате дека е тоа добро решение?
Таравари: Од разделување на клиниките очекувањата беа огромни, дека ќе се штеди, дека ќе се контролира, по два директора во секоја клиника, ќе има специјални менаџерски курсеви за директорите, врзани потписи, но искуството покажува дека не функционираше како што треба. Директорите беа директори за да се условуваат еден со друг. Затоа ги редуциравме и тоа помина во првите 50 дена од владата. Сега имате клиники каде што се врши набавка на ракавици, на пример, за две денари, а има и клиники каде што се 0,5 денари. Тоа не е во ред. Друго е кога се набавува за една клиника, многу подобро е кога се набавува за 30 клиники.
360°: Господине Таравари, вие сте човек од внатре, тоа што ние го слушаме, а веројатно и пошироко во јавноста се слуша, е дека главната корупција на Клинички е во начинот и тајминизите на исплаќање од клиниките до добавувачите и дека кому, кога и колку ќе исплатите е начинот како функционира главната корупција. Вака нема ли да направите конгломерат којшто уште повеќе ќе го засили ризикот од корупција?
Таравари: Најголемите долгови на клиниките се долгови една кон друга и ако ги споиме, јас мислам дека ќе се рационализира работата. Се согласувам дека ако направите една единица шансите се поголеми за да се злоупотребува, меѓутоа ако направите добра организција, со транспаретно работење, со борд на директори што ќе раководи, еден генерален директор, јас мислам дека може да се менаџира успешно и, на крајот на краиштата, искуствата од сите држави околу нас, па и генерално во европските држави, е дека клинички центар е еден, не може да се оддели во 32 функционални или нефунцкионални единици. Така што, пробавме со дезинтегрирање, не функсионираше и перпцепција на повеќето доктори што работиме таму е дека подобро функциониравме кога бевме споени во еден клинички центар отколку сега. Затоа јас мислам дека е неопходно да се вратиме и тоа беше идеја уште во 2017 г. кога сто дена бев министер за здравство. Меѓутоа, тогаш бев само 3-4 месеци министер и не успеав тоа да го реализирам и среќен сум што има поддршка од повеќето колеги на Клинички дека идејата за спојување е добра.
360°: Дали ја напуштате идејата за изградба на нов клинички центар?
Таравари: Не ја напуштаме, меѓутоа искрен да бидам до крај, повеќе министри кажале дека ќе направиме нов клинички центар и никогаш не се изградил за 30 години. Мене ми изгледа несирозно сега да кажам дека ние ќе изградиме.
360°: А потребен ли е нов клинички центар?
Таравари: Апсолутно, апсолутно… Јас како министер за здравство сум го споделил ставот со премиерот дека на Македонија во Скопје ѝ треба нов достоинствен клинички центар. Ако започнеме еве денеска со клинички центар, минимум ќе ни треба 5 до 7 години за да биде тоа функционално и сите пациенти, доктори, медицински персонал да одат во новиот клинички центар.
360°: Но, мора да се почне.
Таравари: Мора да се почне секако, меѓутоа и да почнеме денеска, ни требат седум години. За тие седум години зарем мора да се лекуваат пациентите во ваква интензивна нега, во овие хируршки сали!?
360°: Супстандардно изгелдаат дел од просториите таму.
Таравари: Апсолутно, затоа ви велам – во меѓувреме не треба нешто капитално и многу да се инвестира, меѓутоа идејата стои и кога ќе имаме веќе некакво идејно решение, тогаш ќе излеземе, ќе кажеме дека ние планираме и нов клинички. Засега не го кажувам тоа.
360°: За време на министерувањата на Филипче и на Сали многу се зборуваше за таа идеја, но ништо не се случи.
Таравари: Јас како министер за здравство мислам дека ние треба да завршиме со децентрализацијата. Многу е битно Штип, Тетово, Струга, Охрид и Битола да се пофункционални, а за да биде така мораме барем две болници што се многу битни, Штип и Кичево, да го завршиме. Штип започна да се гради од 2011 или 2010 и сè уште е за никаде, треба да се заврши тој проект. Кичево општата болница замислете пред 28 години е започната да се гради и уште е карабина. Подобро да ги завршиме овие болници оти јас не знам некоја нова болница изградена во Македонија во последните 30 години. Ако успееме идната година да започнеме со Штип и Кичево и тоа да се заврши во рок од две-три години, па тогаш да почнеме да размислуваме за нов клинички центар.
360°: Сево ова како да им оди во прилог на приватните болници кои жнеат профити?
Таравари: Секако, така е додека не направиме сериозен клинички центар во Скопје, а тоа е неопходно да се направи – дали ќе се направи од нас или некој после нас ќе го направи, меѓутоа како проект тоа мора да постои и мора кога-тогаш да се изгради.