Семејството на бебето, како што додава министерот за здравство, а како што и претходно објави порталот „Икс“, се сомнева дека детето било нападнато по вербална расправија со медицинските сестри за време на приемот во болницата
Министерот за здравство Арбен Таравари вечерва во објава на Фејсбук информира дека дознал за случајот со тримесечното бебе кое се здобило со повреди при престојот на Клиниката за детски болести, а за кој првично објави порталот „Икс“. Семејството на бебето, како што додава Таравари, а како што и претходно објави медиумот, се сомнева дека детето било жртва на вработено лице во клиниката, по вербална расправија со медицинските сестри за време на приемот во болницата.
Семејството на бебето тврди дека расправијата се случила бидејќи мајката на детето не знаела да комуницира на македонски јазик.
„Доколку овој случај е вистина, оваа медицинска сестра веднаш ќе биде отпуштена и јас лично ќе се погрижам веднаш да биде упатена до правните органи. Каква и да е вистината, виновниците за овој грозен и болен чин ќе бидат пронајдени и казнети“,
пишува Таравари во објавата на Фејсбук.
Министерот за здравство вечерва заедно со директорот на Детската клиника тргна и лично да се сретне со семејството на детето. Оттаму потврди дека детето е повредено и оти има модринки по рацете. Уште еднаш повтори ќе се преземат мерки против секој кој постапил несоодветно со детето.
„Родителите се жалеа дека можеби не е третирано како што треба на Клиниката. Заедно со директорот дојдовме одблизу да видиме што се случува. Сите пациенти се важни, но децата се посебно важни. Од утре треба специјална комисија на Клиниката да разгледа и да ја слушне и другата страна. Ви гарантирам дека веднаш ќе преземеме мерки против тие коишто постапиле лошо кон детето коешто дојдовме вечерва да го посетиме. Не смееме да се однесуваме лошо кон пациентите“,
изјави Таравари од пред семејниот дом на тримесечното бебе.
Случајот со тримесечното бебе кое се здобило со повреди за време на престојот на Клиниката за детски болести го објави порталот „Икс“ во попладневните часови. Набргу потоа беше најавено дека министерот Арбен Таравари ќе одржи прес-конференција во 20:30 часот, заедно со директорот на клиниката. Еден час подоцна, стигна известување дека детето е пуштено од болница и дека министерот и директорот ќе го посетат семејството на бебето во скопски Сарај.