Одговарајќи на новинарско прашање, Танер потврди дека на денешната средба со Петровска зборувале и за уставните измени, кои се услов земјата да продолжи со пристапните преговори со ЕУ, нагласувајќи дека тоа се прашања кои се исто така многу битни за Виена, како што се битни и за Скопје
За Австрија и понатаму останува главен приоритет проширувањето со земјите од Западен Балкан во безбедносната и одбранбената политика. Војната во Украина уште повеќе нагласува колку е битно нашите пријатели од Западен Балкан да ги поддржиме на нивниот пат кон европската иднина. Австрија посакува Северна Македонија да ги продолжи и да ги реализира пристапните преговори со ЕУ и тоа преку конкретни чекори кои ќе значат голем напредок, изјави денеска австриската федерална министерка за одбрана Клаудија Танер на заедничката прес-конференција во Скопје со нејзината колешка и домаќин, министерката за одбрана Славјанка Петровска.
„Стабилноста и безбедноста на земјите од Западен Балкан е нешто што треба да се постигне и тоа не е нешто што е цел само за тие земји, туку вистинска цел и за нас. Притоа, не треба да заборавиме на една околност. Војната во Украина сè уште не е завршена. Крајот на оваа војна сè уште не може да се согледа, а не е исклучена и можноста од проширувањето на војната во насока на Европа од гледна точка на нашите експерти. Затоа е уште повеќе битно превентивно да се делува за да се зголеми стабилноста, таму каде што е нужно таа да се реализира за да се зголеми способноста за пружање отпор во загрозените региони и за да може да се поддржат напорите за одбрана од сите закани кои доаѓаат од надвор. Со тоа ние можеме да дадеме голем придонес во нашата заедничка безбедносна и одбранбена политика“,
рече австриската министерка.
Одговарајќи на новинарско прашање, Танер потврди дека на денешната средба со Петровска зборувале и за уставните измени, кои се услов земјата да продолжи со пристапните преговори со ЕУ, нагласувајќи дека тоа се прашања кои се исто така многу битни за Виена, како што се битни и за Скопје.
„Зборувавме за следните чекори што би можеле да се преземат во оваа насока за Македонија побрзо да стане членка на ЕУ“,
посочи таа.
Министерката Петровска истакна дека посета на Танер е уште еден доказ за тоа дека Северна Македонија и Австрија се партнери во справувањето со предизвиците со кои се соочува Европа.
„На регионот му се потребни надеж и сигнал – дека не е заборавен и дека сè уште претставува приоритет за Европската Унија и тоа го гледаме и во вашата посета, особено имајќи предвид дека Австрија е наш близок партнер и поддржувач во достигнувањето на оваа цел. Да не дозволиме да се создаде вакуум во кој европските вредности ќе бидат заменети со други агенди кои во последно време се особено видливи преку хибридните закани, дезинформациите и лажните вести, како и сајбер-нападите. Ваквите напади не се воопшто наивни, туку имаат една повисока цел, а тоа е да се блокираат преговорите со ЕУ, да се подрие довербата во ЕУ, во НАТО и во демократските институции. Во таа насока, ја цениме австриската поддршка во рамките на ‘Кремс форматот’, како платформа, регионална за соработка помеѓу Австрија и земјите од Западен Балкан“,
рече Петровска.
Танер и Петровска на средбата се осврнале и на трите мисии во кои учествуваат двете земји, како и на други заеднички проекти кои треба да ги поддржат двете земји.
Петровска ја повтори и поддршката на Северна Македонија за Украина.
„Покрај политичката осуда и политичката поддршка која ја дадовме на Украина – осуда за Русија за овој чин, Република Северна Македонија одлучи и досега донесе осум одлуки за донација на воена опрема и вооружување со кои сметавме дека ќе придонесеме во одбраната на Украина, а не во поддржувањето на војната затоа што Украина е суверена држава која е нападната и има право да се одбрани“,
подвлече Петровска.
Според неа, помошта и поддршката за Украина е прашање на национална одлука за кое, како што вели, апсолутно има разбирање и ја поддржува и смета дека во процесот кој понатаму ќе следува, а тоа е на опоравување на Украина кога оваа војна конечно ќе заврши, е потребно секоја земја да учествува со оние капацитети кои ги има на располагање и за кои смета дека може да придонесе.