Во Северна Македонија, опфатот во 2020 и 2021 година, како и прелиминарните податоци за 2022 година покажуваат дека некои деца пропуштиле една или повеќе дози вакцина, вклучително и првата доза вакцина против мали сипаници. Од суштинско значење е родителите да ја разберат важноста за надополнување на одложените или пропуштените дози на вакцини на своите деца, порачуваат од СЗО
Денеска почна Европската недела на имунизација, а во фокусот на Светската здравствена организација (СЗО) оваа година ќе биде справувањето со загрижувачкиот пад на опфатот со вакцинација кај децата низ светот.
„Многу од причините за овој пад може да се припишат на влијанијата предизвикани од пандемијата со ковид-19, но продолжувајќи да се бориме со последиците од оваа разорна болест, важно е истовремено да ги засилиме и нашите напори за контрола и елиминација и на другите болести што може да се спречат со вакцинација. Во европскиот регион на СЗО, како и насекаде низ светот, невакцинираните и нецелосно вакцинирани лица остануваат изложени на ризик од заразување со болести што може да се спречат, како што се малите сипаници, дифтеријата и детската парализа“,
велат од СЗО во Македонија.
Од СЗО посочуваат дека јавноздравствените системи мора да останат будни и подготвени за пронаоѓање и следење какви било случаи на болести што може да се превенираат со вакцинација. Мора и да ги потсетиме жителите на овој регион дека секоја дадена вакцина и секоја доза на вакцина е важна при спасувањето животи, важна за сопствена заштита и за заштита на најблиските, додаваат оттаму.
Во Северна Македонија, опфатот во 2020 и 2021 година, како и прелиминарните податоци за 2022 година покажуваат дека некои деца пропуштиле една или повеќе дози вакцина, вклучително и првата доза вакцина против мали сипаници. Од суштинско значење е родителите да ја разберат важноста за надополнување на одложените или пропуштените дози на вакцини на своите деца, порачуваат од СЗО.
„Во исто време, мора да продолжиме со напорите да ги направиме вакцините лесно достапни во Северна Македонија. Спречувањето на епидемии преку вакцинација обезбедува апсорбирање на влијанието на непредвидените закани кон здравствениот систем. Висок приоритет сè уште е и заштитата на најранливите категории население од најлошите компликации на ковид-19. Заедно со Министерството за здравство на Северна Македонија, Националниот комитет за имунизација, Институтот за јавно здравје, Центрите за јавно здравје и Здравствените домови кои обезбедуваат услуги за имунизација, а со поддршка од другите партнери на Обединетите нации, СЗО работеше на идентификацијата на невакцинираните и нецелосно вакцинираните лица и на олеснувањето на пристапот до ковид-19 и рутинските вакцини. СЗО ја поддржа и иницијативата за зголемување на достапноста до знаења за вакцинација на локално ниво која исто така почнува оваа недела. Поддршката е дадена и на вакцинацијата на лице место ‘од врата до врата’, преку распоредување мобилни тимови за вакцинација низ целата земја, а во исто време и делење информативни материјали за вакцинација, изработени врз основа на медицината базирана на докази. Овие напори ќе продолжат сè додека сите што ги исполнуваат условите за вакцинација не бидат целосно заштитени“,
се вели во соопштението на СЗО во Македонија.
Од Организацијата посочуваат дека благодарение на ефективноста на вакцините, остварен е голем напредок во Европскиот регион во подобрувањето и заштитата на јавното здравје.
„Во Европскиот регион на СЗО, детската парализа е искоренета уште од 2002 година. Во Северна Македонија, СЗО работеше на елиминацијата на ендемското пренесување на болестите како што се мали сипаници и рубеола. Од 2009 година, на сите девојчиња им се нуди ХПВ-вакцина за заштита од карцином на грлото на матката и други видови на карцином. Имајќи ги предвид сите овие достигнувања, уверени сме дека преку континуирано партнерство меѓу Северна Македонија, СЗО и другите партнери, ќе ги надминеме пречките што ги носи пандемијата со ковид-19. Сигурни сме дека напредокот што го постигнавме во секоја земја и во Европскиот регион во заштитата на децата и возрасните од болестите опасни по живот ќе продолжи и натаму со цел секој да биде заштитен“,
велат од претставништвото на организацијата во Македонија.