Вчера стотици луѓе, вклучително и пациенти, ја напуштија „Ал Шифа“, а дел од медицинскиот персонал изјави дека исто така им било кажано да заминат, наводи кои Израел ги негираше. Новинар кој бил во комплексот за Би-би-си вели дека во „Ал Шифа“ останале само неподвижните пациенти и многу мал број лекари. Претходно, Министерството за здравство на Газа, со кое раководи Хамас, соопшти дека 120 пациенти останале во болницата, како и неодреден број предвремено родени бебиња
Светската здравствена организација (СЗО) ја опиша ситуацијата во најголемата болница во градот Газа – „Ал Шифа“ како зона на смртта , по посетата на комплексот, јавуваат светските медиуми.
Заеднички тим на Обединетите нации предводен од СЗО вчера околу еден час престојувал во болницата проценувајќи ја состојбата по влегувањето на израелската војска во комплексот и евакуацијата на дел од медицинскиот персонал, пациенти и бегалци засолнети во неа, пренесува Би-би-си.
Тимот наишол на масовна гробница на влезот во болницата и му било кажано дека во него се наоѓаат посмртните останки на 80 луѓе.
„Недостигот на чиста вода, гориво, лекови, храна и друга основна помош во последните шест недели предизвика болницата ‘Ал Шифа’ – некогаш најголемата, најнапредната и најдобро опремена болница во Газа – суштински да престане да функционира како медицинска установа. Тимот забележа дека, поради безбедносната ситуација, беше невозможно персоналот да спроведе ефективно управување со отпадот во болницата“,
се наведува во соопштението на СЗО.
WHO leads very high-risk joint humanitarian mission to Al-Shifa Hospital in #Gaza
— World Health Organization (WHO) (@WHO) November 18, 2023
Earlier today, a joint UN humanitarian assessment team, led by WHO, accessed Al-Shifa Hospital in northern Gaza to assess the situation on the ground, conduct a rapid situational analysis, assess… pic.twitter.com/93uIdy8PVA
Повторувајќи ги повиците за прекин на огнот, од СЗО соопштија дека се обидуваат да организираат итна евакуација на преостанатите пациенти и персонал во други објекти во Газа.
Според СЗО во „Ал Шифа“ се наоѓаат 25 здравствени работници и 291 пациент, а неколку смртни случаи биле регистрирани во последните два-три дена поради неможноста да им се даде медицинска помош.
„Пациентите вклучуваат 32 бебиња во исклучително критична состојба, две лица на интензивна нега без вентилација и 22 пациенти на дијализа чиј пристап до спасувачки третман е сериозно компромитиран“,
велат СЗО.
Во меѓувреме, се огласи Белата куќа во врска со извештајот објавен во „Вашингтон пост“ во кој се вели дека Израел, Хамас и САД се на чекор до договор со кој ќе бидат ослободени жените и децата земени како заложници од Хамас на 7 октомври при нападот на јужен Израел во замена за петдневна пауза на борбите меѓу израелските сили и Хамас.
Портпаролот на Белата куќа изјави дека сè уште не е постигнат таков договор, но се работи напорно за тој да биде постигнат.
Инаку, премиерот на Израел, Бенјамин Нетанјаху, ја отфрли можноста за целосен прекин на огнот со Хамас и рече дека ќе размисли само за привремено примирје во замена за враќање на заложниците киднапирани од групата.
Вчера стотици луѓе, вклучително и пациенти, ја напуштија „Ал Шифа“, а дел од медицинскиот персонал изјави дека исто така им било кажано да заминат, наводи кои Израел ги негираше.
Новинар кој бил во комплексот за Би-би-си вели дека во „Ал Шифа“ останале само неподвижните пациенти и многу мал број лекари.
„Ги кренавме рацете и носевме бели знамиња. Минатата ноќ беше многу тешко. Звуците од експлозии и пукотниците беа застрашувачки. Булдожери направија огромни дупки во дворот на болницата и срушија некои згради“,
изјавил новинарот, кој во извештајот на британскиот национален сервис е претставен единствено како Кадер.
Претходно, Министерството за здравство на Газа, со кое раководи Хамас, соопшти дека 120 пациенти останале во болницата, како и неодреден број предвремено родени бебиња.
Израелските одбранбени сили (ИДФ) негираа дека наредиле евакуацијата на болницата, туку дека ги прифатиле барањата на директорот на болницата оние што сакаат да заминат да бидат евакуирани преку безбедна рута.
„ИДФ во ниту еден момент не нареди евакуација на пациенти или медицински тимови и всушност предложи секое барање за медицинска евакуација да биде олеснето од ИДФ“,
се вели во соопштението на израелската војска.
Од друга страна, пак, д-р Рамез Радван, лекар во болницата, во изјава што ја пренесува Би-би-си тврди дека израелските сили му наредиле да ја напушти болницата. Тој ситуацијата во „Ал Шифа“ ја опишал како мизерна посочувајќи дека во неа нема лекови против болки и антибиотици, а на некои пациенти почнале да им „излегуваат црви од раните“.
Израелската војска изминатите денови изврши рација во болницата, како дел од како ја опишуваат „целна операција против Хамас“, трагајќи по команден центар на милитантната група за кој тврдат дека се наоѓа под болницата.
Сепак, засега сè уште нема докази дека Хамас дејствувал од болницата, иако израелските сили во повеќе наврати објавија фотографии и видеоснимки од тунели кои ги откриле под и околу медицинскиот комплекс.
Инаку, вчера Министерството за здравство на Газа соопшти дека повеќе од 80 луѓе биле убиени во двоен напад на израелските сили на бегалскиот камп Џабалија во Газа со кој раководи Агенцијата на Обединетите нации за палестински бегалци (УНРВА).
Извештаите за нападите на кампот предизвика жестоки реакции од страна на повеќемина претставници на Обединетите нации.