Во тужбата не се оспоруваат квалификациите на избраната кандидатка, вишата јавна обвинителка Ирина Трајкоска-Стрезоски, туку одлуката на Управниот одбор на Академијата да гласа тајно наместо, како што предвидува Статутот на организацијата, со јавно гласање
Коментари во јавноста не предизвика само начинот на гласање, туку и фактот што новоизбраната директорката е блиска пријателка со заменик-министерката за животна средина од ВМРО-ДПМНЕ, Ане Лашкоска. Ирина Трајкоска-Стрезоски изјави дека нејзиниот избор нема никакво врска со пријателството, а за „360 степени“ изјави дека смета дека нејзиниот избор е законски
Од ДКСК за „360 степени“ велат дека изборот не бил во согласност со начелото на транспарентно работење
Судијата во Основниот Кривичен суд Скопје и кандидат за директор на Академијата за судии и јавни обвинители, Ненад Савески, поднел тужба поради начинот на кој Управниот одбор на институцијата изврши избор на нов шеф.
Кои се основите?
Бидејќи не сака директно да влијае на постапката, во негово име полномошникот Глигорие Ќатоски, адвокат од Струга, објаснува дека тужбата е поднесена до Управниот суд, главно поради тоа што го виде и целата јавност – одлуката на членовите на Управниот одбор да гласаат тајно.
„Со тужбата бараме одлуката за избор на директор на Академијата да биде поништена. Не сакаме да навлегуваме во посебноста и личноста на веќе избраната директорка, но во секој случај сметаме дека начинот на којшто беше изведен изборот беше спротивно на Законот за Академија на судии и јавни обвинители, Статутот на организацијата и Законот за општа управна постапка во коишто јасно е уредено дека целата постапка за избор и именување на директор на Академија за судии и јавни обвинители треба да има јавен карактер и да се изеде на транспарентен начин.
Со извршеното тајно гласање за избор на кандидат сметаме дека грубо се прекршени принципот на јавност во постапката и начелото на транспарентност на постапката утврдена со законските и подзаконските акти. Дополнително, сметаме дека Управниот одбор грубо излегол надвор од своите надлежности со самата одлука да се спроведе тајно гласање за директор“,
изјави адвокатот Глигорие Ќатоски за „360 степени“.
Освен што се оспорува одлуката за избор на директор, полномошникот на судијата Савески бара и привремена мерка – суспендирање на одлуката за избор на директорка.
„Привремената мерка е поднесена… токму поради причините што сметаме дека постапката во која е донесена одлуката е спротивна на закон, а се со цел да се зачува и така разнишаната репутација на Академијата“,
изјави Ќатоски.
За основата на тужбата веќе пишуваа повеќе медиуми, вклучувајќи ги и „360 степени“.
Во Статутот на Академијата за судии и јавни обвинители, во член 9, став 1 се вели:
„Одлуките на седниците на Управниот одбор… се донесуваат по пат на јавно гласање.“
Гласањето за нов директор секако е одлука што Управниот одбор ја носи на седница. Но, за разлика од минатиот избор на директор во 2022 година, кога секој член на Управниот одбор јавно кажа за кого и зошто гласа, при последниот избор на директор се случи нешто друго.
„Секој член од Управниот одбор можеше да заокружи повеќе од еден кандидат. Сумирањето на гласовите беше јавно, но не и кој за кого и зошто гласал“,
извести ТВ Телма на денот на изборот.
Сè е законски, вели новоизбраната директорка
Или, наместо да ја образложат својата одлука за секој кандидат одделно, членовите на управниот одбор тајно си заокружија за кои кандидати даваат глас, при што можеа да заокружат повеќе од еден кандидат. Потоа тие гласови беа пребројани. На крај, само еден кандидат доби доволно гласови – обвинителката од битолското Вишо јавно обвинителство, Ирина Трајкоска-Стрезоски.
„360 степени“ побара мислење од неа. И за начинот на избор и за фактот што е блиска пријателка со заменик-министерката за животна средина, Ане Лашкоска.
„Сметам дека при мојот избор Управниот одбор постапил во рамките на законските и подзаконските акти. Не можам да коментирам зошто членовите донеле одлука да не гласаат јавно. Членовите на Управен одбор се професионалци, судии и јавни обвинители, кои ја познаваат својата работа и работат согласно законите. Според она што сите го гледавме, едногласен став на сите членови беше да гласаат на таков начин.
Политичката припадност врз основа на приватни фотографии во овој момент не треба да се утврдува. Ние сме другарки цел живот и пред таа да биде во политика, а ќе останеме и во иднина. Нема влијание од мојата другарка врз било кој да гласа за мене. На таа тема не сме ни разговарале“,
рече Трајкоска-Стрезоски
Прашана дали начинот на избор фрла дамка врз нејзиното име, Трајкоска-Стрезоски вели дека каков било товар е дополнителна обврска за неа преку работата да покаже дека Управниот одбор не погрешил при нејзиниот избор.
На прашањето, пак, како ќе постапи ако другите кандидати решат да бараат судска заштита, таа вели:
„Доколку некој од кандидатите реши да бара судска заштита не можам, ниту пак сакам, да го спречам. Секако, доколку се донесе каква било судска правосилна одлука, во врска со начинот на мојот избор, ќе ја почитувам.“
ДКСК вели – мораше да се гласа јавно
„360 степени“ побара и доби мислење и од Државната комисија за спречување на корупцијата и тоа уште пред две недели. Во тој момент немаа отворено предмет за случајот ниту, пак, имале добиено претставка за сомнеж за корупција или за судир на интереси.
Но, на нашето барање за коментар, јасно изразија мислење дека, според нив, изборот не е направен согласно законската регулатива.
„ДКСК, имајќи ја предвид правната регулатива според која е должна да работи Академијата за судии и јавни обвинители, е на став дека одлуката на Управниот одбор директорот да се избира со тајно гласање не е во согласност со начелото на транспарентно работење, ниту со Законот за академијата за судии и јавни обвинители, каде е пропишано дека Управниот одбор работите од својот делокруг ги врши на јавна седница, ниту со Статутот на Академијата, каде во членот 9 став 1 е изречно наведено дека одлуките на седниците на Управниот одбор се донесуваат по пат на јавно гласање.
Токму од таа причина, во Законот за академијата за судии и јавни обвинители и во Статутот воопшто не е пропишана постапка за избор на директор со тајно гласање, по пат на гласачки ливчиња. Напротив, имајќи го предвид значењето на одлуката која се носи од секој член на Управниот одбор се очекува јавно на седница да ја образложи својата одлука за, односно против избор на определен кандидат за директор на Академијата“,
велат од ДКСК за „360 степени“.