„Од извршените целосни финансиски контроли во 24 ЈЗУ за 2023 година, кај 19 ЈЗУ се утврдени неправилности во делот на контролата на спроведувањето на постапките за јавни набавки“, посочи Стојаноски
Контролите што се спроведени од страна на институциите во јавните здравствени установи (ЈЗУ) и клиниките ставаат на површина факти дека СДСМ и ДУИ во здравството гледале бизнис, посочи денеска на прес-конференција пратеникот на ВМРО-ДПМНЕ, Бојан Стојаноски.
„Злоупотребувани се јавните набавки во ЈЗУ и клиниките. Покрај матните тендери на Филипче на централно ниво, за кои јавноста е запознаена, злоупотреби се правени низ поголемиот број ЈЗУ. Од извршените целосни финансиски контроли во 24 ЈЗУ за 2023 година, кај 19 ЈЗУ се утврдени неправилности во делот на контролата на спроведувањето на постапките за јавни набавки“,
изјави Стојаноски.
Како што соопшти, неправилности биле лоцирани во следните ЈЗУ: УК за максилофацијална хирургија – Скопје, Здравствен дом – Гостивар, Здравствен дом – Ресен, Здравствен дом – Струга, УК за урологија – Скопје, УИ за радиологија – Скопје, УК за нефрологија – Скопје, УК за психијатрија – Скопје, Клиничка болница – Тетово, Здравствен дом – Делчево, Здравствен дом – Демир Хисар, Институт за јавно здравје – Скопје, Општа болница – Струга, Здравствен дом – Велес, Општа болница – Струмица, Општа болница со проширена дејност – Дебар, Центар за јавно здравје – Скопје, Специјализирана болница за ортопедија и трауматологија ,,Св.Еразмо“ – Охрид, Здравствен дом – Пробиштип.
„Неправилностите во здравството го метастазирале системот. Злоупотребите излегуваат на површина, одговорност ќе има“,
порача Стојаноски.