ВМРО-ДПМНЕ обвини за конфликт на интереси на премиерот Зоран Заев бидејќи фирма на неговото семејство добила концесија за минерални суровини.
„Според одлуката на Владата на 6 октомври, ’Еленица‘, семејната компанија за цигли на Трајче Заев, Вице Заев и на Катерина Бојовиќ-Заева, доби концесија на цели 30 години за експлоатација на минерална суровина на локалитетот Раборци во Струмичко“,
рече денеска на прес-конференција портпаролот на опозицијата Наум Стоилковски.
Ова, рече тој, е конфликт на интереси и класична злоупотреба и приватизација на Владата и на државните ресурси. Тој ја повика Антикорупциската комисија да се огласи и порача дека ако во овој случај не види конфликт на интереси тогаш може да се самораспушти.
Портпаролот нагласи и дека ова не е првпат фирмата на Заеви да биде форсирана.
„’Еленица‘ се најде во скандал од 220 000 евра, пари од Фондот за иновации, годинава ‘Еленица’ зема пари – државна помош од 841 000 денари, за минимални плати за работниците, а сега Заев обезбеди 30-годишна концесија за минерални суровини“,
рече Стоилковски.