Вакцинирањето на здравствените работници се одвива добро, засега не се пријавени сериозни несакани реакции, вели д-р Милена Стевановиќ, директорка на Инфективна клиника во интервју за МИА.
„Она што е информација која јас ја имам, а која е официјално и на веб-страната и на веб-страната на МАЛМЕД се пријавува од страна на примателите на вакцината дека практично немаме некои поголеми несакани ефекти или реакции од вакцините, вклучувајќи ја и таа на ‘Фајзер’ и оваа на ‘Спутник’, со која е отпочното вакцинирањето. Процесот оди глатко, брзо, многу добро организирано и тоа е еден од најзначајните елементи за спроведување на успешен процес на вакцинација. Забележани се некои алергични реакции, за кои е реагирано соодветно како што треба и јас мислам дека ваквиот систем на вакцинирање, добро организиран процес на вакцинирање, ќе придонесе да истото успешно го спроведеме врз целата популација“,
вели Стевановиќ.
Таа појаснува дека секој граѓанин треба да знае дека со ставањето на вакцината не се постигнува имунитет и треба да се знае дека вакцините се различни.
„Она што е најзначајно да се знае е дека тие сите се апсолутно безбедни и апсолутно ефикасни. Не е тоа само наше мислење, тоа е мислење по спроведени навистина огромен број на вакцинации низ целиот свет. Тие сите имаат некоја своја карактеристика која треба навистина максимално да се искористи, дадена од производителот пред сè, а тоа е најсигурниот извор на информација. Колкаво ќе биде времето, какви ќе бидат дозите, како и колку пати ќе има потреба со колку дози да се спроведе вакцинирањето кај различна популација ќе зависи пред сè од типот на вакцината. Оттука и брзината на создавањето на имунитетот. Јас искрено верувам дека на вака добро организиран процес со максимално ангажирање на здравствениот персонал, меѓутоа и на секој еден поединец кој ќе дојде да се вакцинира ќе постигнеме брз имун одговор кај вакцинираните“,
вели Стевановиќ.
Во однос на зголемувањето на борјот на новозаразени со ковид-19, таа вели дека клучен фактор е непочитувањето на мерките, но и новиот британски сој кој многу полесно се шири меѓу популацијата.
„Зголемувањето на бројката на нови инфицирани секогаш се должи пред се на непочитување на мерките. Се разбира и еден висок процент од околу 70 отсто на асцилирање на британскиот сој носи со себе своја одговорност за покачувањето на бројките, со тоа што една од неговите карактеристики е побрзо, полесно ширење меѓу популацијата. Но, пред се, е непочитувањето на мерките“,
вели Стевановиќ.