Во петокот директорот на училиштето Александар Филипчев во изјава за медиумите рече дека од 360 ученици, кои се хранат во целодневна настава, околу 140 пријавиле исти или слични симптоми, како стомачни тегоби, дијареја и повраќање
Стафилококус ауреус и ентеротоксин биле пронајдени во мострите земени од храна во ООУ „Ѓорѓија Пулевски“ во Аеродром каде што минатата недела околу 140 деца пријавија симптоми на труење. Бактериите биле присутни во бомбиците што ги јаделе учениците, соопшти денеска директорката на Институтот за јавно здравје (ИЈЗ), Марија Андоновска.
„На 27 септември, ИЈЗ доби телефонска дојава од страна на Центарот за јавно здравје (ЦЈЗ) за постоење сомнеж за труење во основното училиште ‘Ѓорѓија Пулевски’ во Аеродром. Екипи од ИЈЗ, составени од тим од епидемиолог од Одделот за епидемиологија, лаборант од Одделот за микробиологија, веднаш излегоа на терен и беа земени мостри, четири бриса од работни површини и садови, како и мостри од оброците подготвени и послужени во кујната. Исто така, беа земени примероци од четири вработени во кујната од раце, нос и грло. ИЈЗ работеше и сабота и недела за да можеме да бидеме брзи и да дадеме релевантни резултати“,
нагласи Андоновска.
Од брисовите земени од површините и од садовите, само на еден сад било најдено зголемен број аеробни мезофилни бактерии што, како што нагласи Андоновска, укажува на нехигиенски услови.
„Брисевите од раце на сите вработени ги задоволуваат хигиенските стандарди. Брисевите од грло и нос на вработените се негативни. По добиените резултати, ИЈЗ ги препрати веднаш овие резултати, согласно законските позитивни процедури, до Министерството за здравство (МЗ), Државниот санитарен и здравствен инспекторат (ДСЗИ) и Агенцијата за храна и ветеринарство (АХВ)“,
подвлече Андоновска.
Во петокот директорот на училиштето Александар Филипчев во изјава за медиумите рече дека од 360 ученици, кои се хранат во целодневна настава, околу 140 пријавиле исти или слични симптоми, како стомачни тегоби, дијареја и повраќање.
„Од 360 ученици кои се хранат во целодневна настава околу 140 ученици се со исти или слични симптоми. Како училиште веднаш ја затворивме кујната, го спречивме топлиот оброк, дел од учениците од целодневна настава беа испратени дома бидејќи не може да останат долго време без топол оброк“,
изјави Филипчев и посочи дека случајот бил пријавен до сите надлежни институции и дека бил извршен вонреден инспекциски надзор.
Од АХВ тогаш информираа дека било наредено затворање на кујната, од која инаку не се носеле оброци за други училишни кујни, сѐ до добивање на резултатите од лабораториските тестирања со што ќе се потврди безбедноста.
„Земени се четири контролни оброци од храната која на учениците им била послужена минатиот ден, мостри од храна – салата од краставица, супа, мусака со мелено месо и компири и бомбици што ќе бидат лабораториски испитани. Исто така, за лабораториско тестирање земени се и пет бриса од работни површини и од опрема, како и испироци од раце од вработените лица во кујната“,
појаснија тогаш од АХВ.