Од ССМ ги повикаа пратениците да поднесат амандмани на комисиската расправа за буџетот за 2023 година, со кои во ставките за плати, додатоци и надоместоци на плати за сите вработени во јавниот сектор би било предложено да се зголеми масата на пари за најмалку 15 отсто
Сојузот на синдикати на Македонија (ССМ) реагира дека предлог-буџетот за 2023 година дополнително ќе придонесе за недостоинствен живот во земјава, а до координаторите на пратеничките групи во Собранието достави отворено писмо со предлог-барање сите пратеници едногласно да предложат и изгласаат подобрување на работничкиот стандард.
Од ССМ ги повикаа пратениците да поднесат амандмани на комисиската расправа за буџетот за 2023 година, со кои во ставките за плати, додатоци и надоместоци на плати за сите вработени во јавниот сектор би било предложено да се зголеми масата на пари за најмалку 15 отсто.
„На тој начин да го вреднувате трудот на вработените во здравството кои за жал не добија никакво усогласување на нивните плати со зголемувањето на минималната плата оваа година, а кои во изминатите неколку години со нивниот труд го чуваа Вашето здравје и Вашите и животите на сите граѓани во време на пандемијата од ковид-19,. Потоа, вработените во полицијата, управата и правосудството, армијата на кои со дискриминирачки пристап, Владата во изминатиот период, без никакви критериуми и без никаква методологија им зголемуваше плати за 1, 2, 3, 5 или 10 отсто“,
се укажува во писмото од ССМ.
Од Синдикатот додаваат оти пратениците не треба да ја следат методологијата на министерот за финансии Фатмир Бесими кој, како што велат, ги зголемил платите на вработените во неговото министерство.
„На тој начин, особено пратениците од владејачкото мнозинство кои гласаа против амандманите на ССМ и работниците во ребалансот на буџетот и жестоко се противеа да се предвидат средства во истиот за 2 806 денари за сите работници во јавниот сектор за усогласување на платите со минималната плата, а што исто така е причина на нивната Влада да и се случува штрајк во јавниот сектор кој трае најдолго во историјата на државата, а истовремено предизвикаа и сите работници преку ССМ да ја тужат државата пред домашните и меѓународните судови и институции“,
велат од Синдикатот.
Затоа, од пратениците побараа за сите вработени во јавниот сектор за кои не се педвидени средства од буџетот за зголемување на платата, да се предвидат средства за усогласување и зголемување на платите за минимум 15 отсто. Притоа, додаваат од ССМ, пратениците да го следат примерот на министерот Бесими и на тој начин, како што велат, да се спречи Владата во дискриминаторскиот пристап кон своите вработени.
„За Владата линеарното зголемување на платите не беше решение, а процентуалното зголемување на платите е решение согласно нивните веќе воспоставени принципи, кои и вие како креатори на законите и ние како претставници на работниците ќе ги следиме“,
порачува ССМ во писмото.
Од ССМ додаваат оти работниците не забораваат лесно кои осум пратеници од владејачкото мнозинство, како што велат, ги предале при носењето на ребалансот на Буџетот за 2022 година, односно кои гласале против амандманот на работниците, па нема да заборават сега, „исто како што не заборавија на пратениците кои подадоа рака на работниците и за амандманот за усогласување на платите и за амандманот за зголемувањето на минималната плата“.