Првиот човек на ССМ, Слободан Трендафилов, уште еднаш ја повика Владата на разговор во однос на прашањата кои ги засегаат работниците, а доколку барањата не бидат прифатени, како што рече, незадоволството ќе биде изразено на улица
Сојузот на синдикати на Македонија (ССМ) не се откажува од барањето за зголемување на минималната плата за 6 000 денари како и покачување на сите останати плати, изјави денеска синдикалниот лидер Слободан Трендафилов.
Првиот човек на ССМ уште еднаш ја повика Владата на разговор во однос на прашањата кои ги засегаат работниците, а доколку барањата не бидат прифатени, како што рече, незадоволството ќе биде изразено на улица.
„Ние не отстапуваме од барањето за повисока плата за работниците. Еве и денеска ги повикувам да не викнат на маса, да седнеме да разговараме по однос на прашањата кои ги тангираат работниците. Доколку нема слух се гледаме на улица“,
изјави Трендафилов од Прилеп каде што Синдикатот им даде поддршка на вработените во Терминалот кои денеска протестираа.
Според Трендафилов, предложеното она што го предлага ССМ е подадена рака и кон работодавачите кои сакаат да ги задржат квалификуваните работници во Македонија, меѓутоа и кон Владата.
„Предложивме зголемувањето да се случи во неколку чекори. Првиот чекор е, доколку може, Владата од едниот дел во другиот дел од буџетот, да ги субвенционира придонесите. Не да ги даде парите на работодавачите, но во име на работниците да ги уплати во Фондот за ПИОМ за разликата од 6 000 денари. Вториот предлог беше работодавачите да бидат ослобоени за овој износ од 6 000 денари, да ги плаќаат придонесите во рок од 12 месеци со што ќе им помогнеме да се реорганизираат за да може да исплатат повисоки плати, а од друга страна, по истекот на тие 12 месеци, да ги плаќаат придонесите за задолжително социјално осигурување и третиот предлог беше да си ги плаќаат придонесите на целиот износ, на 500 евра. За жал, иако голем дел од работодавачите го прифатија овој предлог на ССМ, дури дополнително предлагаа да се замрзнат придонесите, а да ги зголемат платите на работниците, Владата сметаше дека на работниците не им е потребна повисока плата и еднострано, за првпат во историјата од донесувањето на Законот за минимална плата, со усвојување информација на Влада, не утврдено мислење на Економско социјален совет, се објави минималната плата во навистина минимален износ кој не им помага на работниците“,
рече претседателот на ССМ.
Според Трендафилов, Владата се иззема од одговорноста иако е најголем работодавач, на 128 000 работници.