ССМ инсистира да се почитува социјалниот дијалог и законот да ја помине целокупната законска процедура, да се овозможи претставник на ССМ да учествува во работата на собраниските комисии кога ќе се разгледува предлог-законот и да се имаат предвид забелешките, мислењата и предлозите на Сојузот на синдикатите на Македонија
Го изразуваме своето незадоволство од продолжување на практиката да се носат закони кои се од сериозно значење за работничките права и интереси по брза постапка со европско знаменце, без почитување на стандардната процедура, која треба да вклучи активно учество на заинтересираните страни, по пат на јавна расправа и социјален дијалог преку Економско-социјалниот совет, реагираат преку писмено соопштение од Сојузот на синдикатите на Македонија (ССМ) и Синдикатот на работниците од управата, правосудните органи и здруженија на граѓани на Република Македонија (УПОЗ).
„Доколку ваквиот закон помине, одговорноста ќе биде на тие што го донеле и на тој што го предложил, особено поради тоа што ваквиот Закон значи околу 2 500 денари помалку во џебот на вработените во јавниот сектор за кои се применува Законот за административни службеници што е недозволиво да се случи на крај на мандат, на неколку денови пред избори во Македонија“,
велат од ССМ и од УПОЗ.
Според нив, станува збор за донесување на Предлог Законот за административни службеници со кој се регулираат правата и интересите на дел од вработените во јавниот сектор.
Во таа насока, ССМ инсистира да се почитува социјалниот дијалог и законот да ја помине целокупната законска процедура, да се овозможи претставник на ССМ да учествува во работата на собраниските комисии кога ќе се разгледува предлог-законот и да се имаат во предвид забелешките, мислењата и предлозите на Сојузот на синдикатите на Македонија.
„Членот 72 од предложениот текст на Законот за административни службеници да се брише и до отпочнувањето на пресметка на основната бруто платата согласно член 13 од ОКД за јавен сектор на начин што просечната бруто плата се множи со коефициентот на сложеност на работното место да остане на сила член 87 од постојниот Закон за административни службеници кој гласи: Основната компонента на плата ја сочинуваат: минимална плата, дел на плата за степен на образование, дел на плата за ниво и дел на плата за стаж. Минималната плата е онаа која министерот за труд и социјална политика, ја објавува во ’Службен весник на Република Северна Македонија’ согласно со закон“,
велат од ССМ.
Оттаму велат дека на овој начин во интерес на обезбедување на основната егзистенцијата на вработените во јавната администрација во услови на инфлација, зголемени цени на основните животни продукти и енергенсите и намалената куповната моќ на населението, потребно е во текот на 2024 година да се изврши усогласување на платите на вработените во јавниот сектор со порастот на минималната плата, а од 01.3.2025 година, ќе отпочне пресметка на основната бруто платата согласно член 13 од ОКД за јавен сектор на начин што просечната бруто плата се множи со коефициентот на сложеност на работното место.
„Во член 73 да се уреди учество на синдикатот во преговорите со Владата за утврдување на вредноста на бодот неопходни за пресметување на основната платата на државните и јавните службеници, односно коефициентите на сложеност на одредени работни места да се уредат со колективен договор. Член 75 да се преформулира и да се исклучи можноста за добивање на слободни денови за ангажман за работа надвор од редовното работно време туку за ваквите ангажмани вработените да добијат соодветен паричен надоместок согласно закон и КД. Во член 64, застареноста кај поведувањето на дисциплинските постапки да се ограничи на 1 месец од дознавање и 3 месеци од сторување на повредата“,
пишува во писмото на ССМ.
Минатата недела Азир Алиу, министерот за информатичко општество и администрација, ги повика пратениците да ги разгледаат и да ги расчистат сите дилеми во врска со пакетот закони предложен од МИОА, кои пред повеќе од еден месец се усвоени од Владата, а се заглавени во Собранието.
Се работи за законите поврзани со јавната администрација, за дигитализација и за медиуми на кои МИОА работело подолго време и кои се клучни и од суштинско значење за олеснување на животот на граѓаните. Тие се поврзани и со трите столба – администрација, дигитализација и медиуми од програма на ЕУ ‘Дигитална Европа’ со која летото нашата држава склучи договор“,
рече тој.
За најавите во дел од медиумите дека ќе си поднесе оставка од функцијата министер поради тоа што овие закони не се ставени на собраниска седница, Алиу рече дека тие шпекулации доаѓаат од оние што тоа и му го посакуваат.
„Ако некој ми каже во очи дека овие закони се поврзуваат лично со моето име, веднаш ќе дадам оставка. Досега ми е кажано дека овие закони не се во постапка заради причини во кои јас лично не верувам. Но, ако тоа се докаже, ќе поднесам оставка пред мојата политичка партија, а потоа и до Владата. Сепак, ние сме министри и имаме надлежности и обврски и кон нашата политичка партија“,
рече Алиу.
Премиерот Талат Џафери вчера по преземањето на новата функција во Владата на оваа тема рече дека во насока на предлог-законите по однос на реформата во јавната администрација, тоа не се лични проекти и проекции на членовите на Владата.
„Не сум човек што работи под ултиматум. Јас во принцип не работам така, не ми е својствено да прифаќам ултиматум. Секој има своја слобода. Како ќе цени дека треба да постапи, така нека постапува, а за последиците нека си мислат субјектите од каде што доаѓаат и од каде што добиле номинација, без оглед кој од каде доаѓа. Тоа е ставот. Јас хипотетички нема да зборувам во смисла што ќе се случи и што доколку би се случило. Оставам на конкретна состојба како и да се случуваат работите така и да се изнајдат решенијата за надминување на работите“,
рече Џафери.