Родителите на малата Данка денеска беа на распит во полиција. Српските медиуми јавуваат дека полицијата го запленила мобилниот телефон на мајката и го испратила на вештачење
Сѐ уште се трага по Данка Илиќ, двегодишното девојче кое исчезна вчера околу 13:45 часот во приградската населба Бањско Поље, недалеку од Бор во Србија. Во моментот на исчезнувањето, Данка носела виолетови панталони и јакна во маслинесто зелена боја. Денеска околу 17 часот и 30 минути полицијата престана да го пребарува теренот.
„Сите досегашни резултати укажуваат дека девојчето не е на овој простор од околу 10 квадратни километри“,
соопшти полицијата.
Мајката раскажала како Данка исчезнала додека одела да му даде вода на постарото дете.
„Се свртев да му дадам вода на другото дете и кога повторно погледнав, ја немаше“,
изјавила мајката за Телеграф.
Родителите на малата Данка денеска беа на распит во полиција. Српските медиуми јавуваат дека полицијата го запленила мобилниот телефон на мајката и го испратила на вештачење. На социјалните мрежи се шири и видео од надзорна камера на која се гледа местото од каде што исчезнала Данка. На видеото не се гледа многу, освен дека во еден момент поминува автомобил. Од МУП српската полиција сѐ уште не се изјасниле за видеото.
Веста за исчезнувањето на девојчето брзо се прошири на социјалните мрежи. Во претресот учествуваа војска, полиција, кучиња трагачи и граѓани.
Исчезнувањето на двегодишната Данка по првпат го активира системот „Најди ме“ (Amber Alert) во Србија со помош на кој јавноста веднаш се известува за исчезнатото дете.