Средношколскиот сојуз бара Државниот просветен инспекторат да ги објави извештаите од инспекциите спроведени во четирите училишта за кои имаше обвинувања дека барале пари од учениците за свидетелства. Дополнително, од Сојузот алармираат и за проблемот со неиздавање свидетелства на сите ученици, за што велат дека Бирото за развој на образованието нема објаснување.
„Ги поздравуваме инспекциите , но нè интересираат методологијата и заклучоците до кои дошле инспекторите. Се обраќаме и до училиштата – вратете ги парите кај учениците, зашто само така може да го решите овој проблем. Срамно е да се наплаќаат свидетелства кога било, но особено во училишна година целосно одржана преку неквалитетна онлајн настава со слабо обучени професори“,
изјави Лука Павиќевиќ од Средношколскиот сојуз.
Пред десетина дена од Средношколскиот сојуз го информираа Инспекторатот дека цели класови плаќале од 150 до 200 денари за свидетелства. Оваа појава ја регистрирале во училишта од Скопје, Тетово и Гостивар.
„Средното медицинско училиште во Тетово наплаќа меѓу 150 и 200 денари за свидетелство, додека економското училиште во Тетово бара износ од 150 денари за издавање на свидетелството и на дипломата за крај на средното образование. За жал, овие такси не се појава само во тетовските училишта. Скопската гимназија ’Зеф Љуш Марку‘ наплатува од своите ученици 100 денари за свидетелството, а гимназијата ’Мирче Ацев‘ во Прилеп 30 денари од ученик“,
соопштија од Сојузот.
Од МОН тогаш потврдија дека имало изолирани случаи, за кои, како што најавија, ќе постапат надлежните институции.